Е Господарескоро Диве

¹А со ќерелапе лафи баши о времиа хем саатиа, пхрајљален, нае тумен потреба те пишинелпес туменге; ²соске коркори тумен шукар џанена дека е Господарескоро диве ка авел сар чор ки рат. ³Кога ка ваќерен: мир хем безбедност, тогаш ненадејно ка перел уништување ки ленде, сар дук тари кхамни џувли, хем на ка нашен латар.

⁴Ама тумен, пхрајљален, на сијен ки темница – та о Диве те аракхел тумен сар чор, ⁵соске сарине тумен сијен чхаве е светлинакере хем чхаве е дивескере, на припадинаја е раќаке, ниту е темницаке; ⁶хем аѓар, те на сова сар о јаверa, него те ова џангавде хем те ова нерне: ⁷соске окола кој совена, совена раќате, хем кој маќовена, раќакоро маќовена.

⁸Амен, кој припадинаја е дивеске, те ова нерне, те урава амен ко оклоп е веракоро хем е мангипаскоро, хем е надежеја е спасениескоро сар шлеми, ⁹соске о Девел на определинѓа амен баши холи, него те придобина спасение преку амаро Господари о Исус Христос, ¹⁰Кој муло баши аменге за да те живина заедно Олеја, било те ова џангавде или те сова. ¹¹Одолеске утешинен тумен машкар туменде хем надградинен тумен јек јавере сар со хем ќерена!

Сар требела те живинен

¹²Молинаја тумен, пхрајљален, те ден сајгија околенге, кој трудиненапес машкар туменде, сар со грижиненапе туменге ко Господари, хем опоменинена тумен. ¹³Цениненлен упредер о са мангипаја, баши оленгоро дело. Живинен ко мир машкар туменде.

¹⁴Молинаја тумен панда, пхрајљален, сикавен е неуреднон, охрабринен околен со дарана, поможинен е слабон, овен трпелива сариненцар. ¹⁵Дикхен, никој никаске те на иранел билачхипа билачхипаја, него секогаш џан пало одова сој тано шукар машкар туменде хем ко сарине!

¹⁶Радујнен тумен секогаш! ¹⁷Молинен тумен стално! ¹⁸Благодаринен баши са, соске одовај тано е Девлескири војља баши туменге ко Христос Исус! ¹⁹Ма ачхавен o Духо! ²⁰Ма презиринен о пророштва, ²¹испитинен са, задржинен о шукар. ²²Иќерен тумен тари секоја појава таро билачхипе!

Поздравиа хем благословиа е пхраленге

²³А коркори о Девел е мирескоро те осветинел тумен целосно! Хем тумаро духо, хем душа, хем тело те запазиненпес бизo махана ко ајбе амаре Господарескоро о Исус Христос! ²⁴Верно тано Окова, Кој повикујнела тумен хем Кој хем ка ќерел одова.

²⁵Пхрајљален, молинен тумен хем баши аменге! ²⁶Поздравинен са е пхрален свето чумибаја! ²⁷А задолжинава тумен ко Господари, акава писмо те читинен са е пхраленге. ²⁸И благодат амаре Господарескири о Исус Христос те овел туменцар. Амин!