Е Павлескоро поздрав џи ко Тимотеј

¹О Павле, апостоли е Христа Исусескоро, пали повелба е Девлескири, амаро Спасители, хем е Христа Исусескоро, амари надеж, ²џи ко Тимотеј, о чачикано чедо ки вера: и благодат, милост хем мир таро Девел о Дат хем о Христос Исус, амаро Господари.

Ма те сикавен појавер учење

³Сар со молинѓум тут, кога џава сине ки Македонија, те ачхове ко Ефес, за да те заповедине некаске те на сикавен појавер, ⁴хем те на ден внимание баши парамиса хем бизокрајо родословиа, кој повише чхивена ко препирке, отколку те поможинен баши е Девлескири управа, којај тани пали вера.

⁵А и цел е наредбакири тани: мангипе таро чисто срце, хем шукар совест хем нелицемерно вера, ⁶таро со некој откога на ресле и цел, заостранинге ко чуче лафиа – ⁷мангипаја те овен учитејља е Законескере, иако на хаљовена ни окова со ваќерена, ни окова со тврдинена упорно!

⁸Амен пак џанаја дека о Закони тано шукар, ако некој користинела законски, ⁹џандипаја акава: дека о закони нае тано воспостајмо е праведникоске, него баши о беззакониќа хем о непокорна, баши о безбожниќа хем о грешниќа, баши о несвета хем нечиста, баши о убијциа е даденгере хем о убијциа е дајенгере, баши окола кој мударена манушен; ¹⁰баши о блудниќа хем баши о мурша кој тане полово изопачиме, баши о трговциа робонцар, хем баши о ховавне, баши ховавне заклетве со дена, хем баши о са јавер сој хем тано противно е састе наукаке, ¹¹според о славно Евангелиe е блажено Девлескоро, ковај тано манге доверимо.

E Девлескири благодат спрема о Павле

¹²Благодаринава е Христа Исусеске, амаро Господари, кој денѓа ман сила баши одова, соске рачунинѓа ман верно хем постајнѓа ман ки служба, ¹³ман, кој поангле сијум сине хулинава, хем гонинава, хем насилнико. Ама добинѓум милост, соске ќерѓум одова таро биџандипе хем на верујнавајне. ¹⁴А и благодат амаре Господарескири, е вераја хем мангипаја изобилинѓа ко Христос Исус.

¹⁵Верно тано о слово хем достојно – баши пхердо примиба: о Христос Исус ало ко свето те спасинел е грешникон, таро кој сијум прво ме. ¹⁶А добинѓум милост токму баши одова, за да те сикавел о Христос Исус, прво ки манде, са Пли трпеливост, баши пример околенге, кој ка верујнен ки Лесте баши вечно живото. ¹⁷О царо е веконгоро – о бесмртно, невидливо, единствено Девел – чест хем слава ко са о веќа. Амин!

¹⁸Акаја заповед предајнавала туке, чедо Тимотеј, согласно о поранешна пророштвиа баши туке: за да те воине шукар војна, ¹⁹те овел тут вера хем шукар совест, кој некој отфрлингела хем претрпинге бродолом е веракири. ²⁰Машкар ленде тане о Именеј хем о Александар, кој предајнѓумлен е сатанаске, за да те сикљовен те на хулинен.