Сајдин саринен

¹Ма aкош тут oштро попхуре манушеја, него опоменинле сар дадеске, е потернен сар пхрајља, ²о попхуре џувља сар даја, о потерне сар пхејна секоле чистотаја.

Сајдин е удовицен

³Поштојн е удовицен, кој тане чачикане удовице. ⁴Ако некоја удовица исила чхаве или унуќа, ола нека сиклон прво те сикавен побожност ки пли фамилија, хем те иранен пле родителенге, соске одовај тано шукар хем угодно англо Девел.

⁵А која тани чачикани удовица хем ачхили коркори, ој чхиѓа пли надеж ко Девел хем тани постојано диве и рат ко родиба хем молитве. ⁶А окоја кој живинела баши задоволствиа џивди тани мули.

⁷Пренесин хем акава: те овен непорочна. ⁸Ако некој на грижинелапес баши пленге, поготово баши о кхерутне, одрекујнѓапе тари вера хем тано побилачхо таро окова кој на верујнела.

⁹Е удовиценге ко списако те пишинелпе асавки удовица, која нае тани потерни таро шовардеш берш, која сине ромни јеке ромескири, ¹⁰кова исила сведоштво баши шукар дејља; ако дикхља е чхавен, ако сине гостољубливо, ако тхоѓа о пре е светиенгере, ако поможинѓа е цидименге; хем ако џала сине пало секова шукар дело.

¹¹А потерне удовице ма примин, соске кога ка циденлен о телесна страстиа спротивно таро Христа, мангена те жениненпе, ¹²солеја цидена упри песте осуда, соске отстапинге таро прво ветување. ¹³А освен одова, соскеј тане бизи бути, сикловена те џан ко кхера. Хем на само бизи бути, него хем тале лафчике хем са мангена те џанен, хем ќерена лафи со на требела.

¹⁴Хем аѓар, мангава о терне удовице те жениненпес, те бијанен чхавен, те водинен домакинлуко, за да ма те ден е противникоске нисаво муј баши те хулинел. ¹⁵Уствари, некој веќе заостранинге хем цидинге пало сатана.

¹⁶Ако некој верно или верна иси удовице, нека поможиненлен, хем нека ма те овел оптеретими и црква, за да те шај те поможинел околенге кој тане чаче удовице.

Сајдин е старешинен

¹⁷Е старешиненге, кој ќерена шукар пли бути, требела те сикавелпе ленге дупло сајгија, посебно околенге кој трудиненапе ко слово хем поучинена. ¹⁸Соске о Свето Писмо ваќерела: „Ма пхан о муј е гурувескоро со ќерела гив“ хем „о работнико заслужинела пли плата.“

¹⁹Ма примин кога некој ваќерела против о старешине, освен пали изјава таро дуј или трин џене сведоќа. ²⁰Окола кој грешинена кош тут ленцар англо сарине, за да те овел е јаверенда дар.

Пазин пред те судине хем те ќере нешто

²¹Хем задолжинава тут англо Девел, хем англо Христос Исус, хем англо избириме ангејља, те пазинеле акава бизо пред те судине хем те ќере нешто те делине сар ка авел туке.

²²Ма чхив те васта пресигате никаске, ма ле дело ко туѓа гревиа! Пазинту чисто тут!

²³Ма пи више само пани, него ле похари хем мол, баши тло желуднико хем често насвалипа.

²⁴О гревиа некаскере манушенгере дикхјона хем џана ко судо англедер оленде, а некој џана пало ленде. ²⁵Исто аѓар хем о шукар дејља дикхјона, а хем кој нае тане, нашти те гаравенпес.