Те овел тумен исто мисле хем исто мангипе

¹Хем аѓар, ако иси несави утеха ко Христа, ако иси несаво охрабрување таро мангипе, ако иси несави заедница е Духоскири, ако иси несаво андруно сочуство хем сомилост, ²исполнинен мло радост, хем мислинен исто те овел тумен исто мангипе, еднодушна ко мисле водиме ко јек.

³Ма ќерен ништо таро те натпреваринен тумен или таро суетно себичност, него ко понизност рачунинен тумен јек јекестар побаре таро тумендар! ⁴Ма дикхен секој само плеске, него секој нека дикхел ко окова со ќерелапе лафи баши јаверенге.

Те овел тумен исто мисла која сине ко Исус Христос

⁵Те овел тумен ки туменде и исто мисла, која сине хем ко Исус Христос; ⁶Кој иако тано е Девлеске ко облик, на рачунинела сине сар те грабинел одова сој тано јек е Девлеја, ⁷него понизинѓапе Коркори Пес, хем леља облик таро слуга, уло слично е манушенцар. ⁸Хем откога араклисалило ко лико сар мануш, Ов понизинѓапе Коркори Пес хем уло послушно џи ко мерибе, чак хем џи ко мерибе ко крсто.

⁹Одолеске хем о Девел превозвишинѓале хем денѓале анав, сој тано упро секова анав, ¹⁰хем е Исусеске ко анав те поклонинелпе секоја кочак околенгири: кој тане ко небо, хем ки пхув, хем тели пхув; ¹¹хем секоја чхип те исповединел дека о Исус Христос тано Господари, баши слава е Девлеске о Дат.

О Девел тано Окова, Кој делујнела ки туменде

¹²Одолеске, мле мангљален, сар со секогаш сијен сине послушна, на само кога сијум уза туменде, него панда повише акана, кога на сијум уза туменде, ќерен бути ко тумаро спасение дараја хем треперибаја. ¹³Соске о Девел тано Окова, Кој делујнела ки туменде те манген хем те постапинен, според Олескири војља.

¹⁴Ќерен са бизо те жалинен тумен хем те на акошен тумен, ¹⁵за да те овен бизо махана хем чиста, непорочна Девлескере чхаве, машкар ирамо хем румимо родо, машкар кој ка светинен сар светилке ко свето, ¹⁶иќерибаја цврсто о слово е животоскоро, за да те овел ман солеја те фалинав ман е Христоске ко Диве, дека на прастандиљум ко чучо хем дека на трудинѓум ман ко чучо.

¹⁷Ама, ако хем чхорѓовава сар принос упри жртва хем и служба тумаре веракири, радујнава ман, хем радујнава ман сариненцар туменцар. ¹⁸А исто аѓар радујнен тумен туменда хем радујнен тумен манцар.

О Павле бичхавела е Тимотеје

¹⁹Надинава ман ко Господари о Исус дека ка бичхавав туменге скоро е Тимотеје, та хем меда те утешинав ман кога ка сикљовав сар сијен тумен. ²⁰Соске нае ман никој, кој тано исто душаја сар лесте, кој добором искрено ка грижинелпес баши туменге, ²¹соске са о јавера родена пло, а на окова сој тано е Христа Исусескоро. ²²Тумен џанена олескири докажими верност, дека – сар чхаво е дадескоро – манцар служинела сине ко шириба о Евангелие. ²³Аѓар, надинава ман дека ка бичхававле оле, одма штом ка хајљовав со ка овел манцар, ²⁴а надинава ман ко Господари дека хем меда коркори скоро ка авав.

О Павле палем бичхаѓа е Епафродите

²⁵Рачунинѓум палем баши потребно те бичхавав туменге е Епафродите, мло пхрал хем соработнико хем заедно боринаја амен – а тумаро пратенико, кој служинела баши мли потреба; ²⁶соске сине бут жедно пало сариненде туменде хем сине олеске пхаро соске шунген дека сине насвало. ²⁷Чаче сине насвало паше џи ко мериба, но о Девел смилујсалило, хем на само леске, него хем манге, за да ма те авел манге жал упри жал.

²⁸Одолеске бичхаѓумле поскоро, те радујнен тумен палем кога ка дикхенле, хем меда те овав похари секиримо. ²⁹Хем аѓар, приминенле ко Господари секоле радостеја хем поштојнен асавкен, ³⁰соске баши е Христоскоро дело араклисалило паше џи ко мериба, чхиѓа по живото ко опасност, за да те надоместинел одова со тумен нашти сине те услужинен манге.