2 Solunjajna 2
O Manuš e Bezzakonieskoro
1Molinaja tumen, phrajljalen, uveza baši o ajbe amare Gospodareskoro o Isus Hristos hem baši amaro khediba zaedno ki Leste, 2ma dozvolinen sigate te predomislinen tumen ki tumari godi, nitu te daran ni taro duho, ni taro lafi, ni taro poslanie, sar te phene tano amendar bičhavdo, sar vekje alo e Gospodareskoro Dive! 3Nikoj te na hovavel tumen ko bilo savo način, soske odova nae te ovel dži kote prvo na avela o periba hem na pojavinelapes o manuš e bezzakonieskoro, o čhavo e uništibaskoro, 4koj protivinelape hem vazdelape upreder o sa so vakjerelape Devel ili svetlina, agjar so ka bešel e Devleske ko hrami hem ka prestajnelpe pes deka ovi tano Devel.
5Na setinena li tumen deka vakjergjum tumenge akava panda koga sijum sine tumende? 6Hem akana džanena so zadržinelale za da te pojavinelpes ov doprvo ko plo vreme. 7Soske, i tajna e bezzakonieskiri vekje delujnela, samo te otstraninelpe taro maškar okova, koj akana zadržinelala, 8hem togaš ka javinelpes o bezzakoniko kas o Gospodari ka mudarele Ple zdiveja taro Plo muj hem ka uništinele e pojavaja taro Plo ajba.
9Odovaj tano okova, kaskoro ajbe tano spored o satansko delujbe, sekole silaja, hem čudesno znakoncar hem hovavne čudoncar, 10hem sekole nepravedno hovajbaja, baši okolenge koj merena, soske na priminge o mangipe ko čačipe za da te spasinenpes. 11Hem odoleske o Devel ka bičhalel lenge uverlivo zabluda, za da te verujnen ko hovajba, 12ta te oven osudime sarine, koj na poverujnge ko čačipe, a sinelen zadovolstvo ki nepravda.
Tergjoven cvrsto
13A amen sijem dužna sekogaš te blagodarina e Devleske baši tumenge, phrajljalen, taro Gospodari mangle, soske o Devel izbiringja tumen taro početok baši spasenie, preku osvetuvanje e Duhoskoro hem vera ko čačipe, 14ko kova povikujngja tumen preku amaro Evangelie, za da te dobinen i slava amare Gospodareskiri o Isus Hristos. 15Togaš, phrajljalen, tergjoven cvrsto hem ikjeren o učenje so siklilenlen amendar, bilo preku amare lafia ili preku amaro poslanie.
16A korkori o Gospodari amaro o Isus Hristos hem o Devel amaro Dat, Koj zamanglja amen amen hem dengja amen večno uteha hem šukar nadež pali blagodat, 17te utešinel tumare srcia hem te zojrakjerel tumen ko sekova šukar delo hem lafi!