Galatjajna 4

Čhave hem naslednikja

¹Vakjerava tumenge palem, dži kote tano o nasledniko maloletno, ništoja na razlikujnelapes taro robo, iako tano gospodari ko sa. ²Nego tano telo staratejlja hem upravitejlja dži ko roko opredelimo taro dat.

³Agjar hem amenda, dži kote sijem sine maloletna, sijem sine zarobime telo o prvobitna učenja e svetoskere; ⁴a koga alo o vreme, o Devel bičhagja Ple Čhave, bijamo tari džuvli, bijamo telo Zakoni, ⁵za da te kinel okolen, kola so sine telo Zakoni, za da te primina o posinuvanje. ⁶A pošto sijen čhave, o Devel bičhagjale ko tumare srcia: o Duho Ple Čhaveskoro, Koj vikinela, „Abba, mo dat!“ ⁷Odoleske povekje na sijan robo, nego čhavo; a ako sijan čhavo, togaš sijan nasledniko ko Devel preku o Hristos.

O Pavle darala baši o Galatjajna

⁸Ama tumen poangle, na pendžarena sine e Devle, služinena sine robsko e devlenge, kola ki priroda nae odova. ⁹A akana, koga pendžarena e Devle, ili panda pošukar: otkoga o Devel pendžargja tumen – sar šaj palem te iranen tumen ko slaba hem bedna svetovna bukja, kaske so mangena palem odnovo te služinen robsko? ¹⁰Pazinena ko dive, hem masekja, vremia, hem berša. ¹¹Darava baši tumenge, te na trudingjum man ko čučo baši tumenge. ¹²Molinava tumen phrajljalen, oven sar so sijum me, soske hem meda sijum sar tumende! Tumen ništoja na navredingen man.

¹³A džanena deka prvo puti ki telesno slabost, propovedingjum tumenge o Evangelie; ¹⁴hem o iskušenie, kova sine baši tumenge, ko mlo telo, na otfrlingenle, nitu gadongen tumen olestar, nego primingen man sar Devleskoro angeli, sar o Hristos Isus. ¹⁵Akana, kaj tano okova tumaro blaženstvo? Soske svedočinava tumenge, deka koga bi šaj sine, bi ikavena tumare jajkha hem bi dena man sine olen mange. ¹⁶Dali uljum neprijateli baši odova, so vakjerava tumenge o čačipa?

¹⁷Ola na prastana ko šukar baši tumenge, nego mangena te odvojnen tumen, za da te prastan baši olenge. ¹⁸Maškar odova, šukari sekogaš te prastan ko šukar, a na samo koga sijum me uza tumende.

¹⁹Me čhavalen, kova palem sijum ko bijanibaskere mukje dži kote o Hristos bajrola ki tumende, ²⁰bi mangava te ovav akana uza tumende, hem te meninav mo glaso, soske sijum ko somnenie baši tumenge.

I Robinka hem i Slobodno

²¹Vakjeren mange, tumen, koj mangena te oven telo ko Zakoni: na šunena li o Zakoni? ²²Soske tano pišimo deka o Avraam sinele duj čhave: jek tari robinka, a o javer tari slobodno. ²³Ama okova, tari robinka, bijamo tano ko telo, a okova tari slobodno preku o vetuvanje.

²⁴Akavaj tano vakjerdo slikovito: odola džuvlja tale o duj zavetia; jek tari gora Sinaj, koj bijanela baši ropstvo; adavaj tano i Agara, ²⁵soske i Agara tani i Sinajsko Gora ki Arabija, hem odgovorinela ko avdisutno Erusalim, koj robinela pe čhavencar. ²⁶Ama o nebesno Erusalim tano slobodno, ov tano amari daj, ²⁷soske tano pišimo:

²⁸Hem tumen sijen, phrajljalen, čhave taro vetuvanje sar o Isak. ²⁹Hem sar so nekogaš okova, koj bijasalilo ko telo, goninela sine okole, koj bijasalilo palo duho, agjar tano hem akana.

³⁰A so vakjerela o Sveto Pismo? ‘Palde e robinka hem lakere čhave, soske o čhavo e robinkakoro nae te nasledinel e čhaveja tari slobodno!’ ³¹Odoleske, phrajljalen, amen na sijem čhave e robinkakere, nego e slobodnakere.