O Isus anglo Pilat

¹Hem odma sabaleskoro, o prvosveštenikja, e starešinencar hem e knižnikoncar hem o celo Sinedrioni, phanlele e Isuse, ingargele hem predajngele e Pilateske.

²Hem o Pilat pučljale: „Tu li sijan o Judejsko Caro?“

A Ov odgovoringja leske hem vakjergja: „Tu vakjereja!“

³O prvosveštenikja obviningele but. Ama Ov na odgovoringja ništo.

⁴A o Pilat palem pučljale: „Ništo li na odgovorineja? Dik, kobor kjerena Tut krivo!“

⁵Ama o Isus vekje ništo na odgovoringja, agjar so o Pilat čudinelapes sine.

⁶A ko sekova prazniko mukela lenge sine po jek zatvorniko, kas so ka roden. ⁷Sine ko sindžira o vakjerdo o Varava, ple buntovnikoncar, koj ki buna sine kjerge mudariba. ⁸Hem o narodo vikingja glasno hem počmingja te roden odova, so sekogaš kjerela sine lenge.

⁹A o Pilat odgovoringja lenge, vakjeribaja: „Mangena li te mukav tumenge e Judejsko Caro?“ ¹⁰Soske džanela sine deka o prvosveštenikja predajngele taro zavist.

¹¹Ama o prvosveštenikja čhivena sine e narodon: pošukar te mukel lenge e Varava.

¹²A o Pilat pak odgovoringja hem vakjergja: „Togaš, so te kjerav Okoleja, Kas so vikinenale Judejsko Caro?“

¹³Ama ola vikinge palem: „Raspninle!“

¹⁴O Pilat palem vakjergja lenge: „Savo bilačhipa kjergja?“

Ama ola vikinge panda posilno: „Raspninle!“

¹⁵Togaš o Pilat, mangipaja te ugodinel e narodoske, muklja lenge e Varnava, a e Isuse, otkoga kamšikujngele, predajngjale te ovel raspnimo.

¹⁶O vojnikja ingargele andre ko dvoro, ustvari ki Pretorija, hem vikinge celo četa. ¹⁷Hem uragele purpurna šeja: pletinge venco taro kare hem čhige ki Leste. ¹⁸Hem počminge te pozdravinenle: „Zdravo, Judejsko Care!“

¹⁹Hem khuvenale sine trskaja ko šero, čhungarenale sine hem perena sine ko kočia, klaninenape sine Leske. ²⁰A otkoga lelele ko majtapi, huljage Olestar i purpurno nametka hem uragele Oleskere šeja, hem ingargele te raspninenle.

Raspninenale e Isuse

²¹Hem teringe jeke so nakhela, o Simon Kirineec, koj iranelape sine taro pole, o dat e Aleksandreskoro hem e Rufeskoro, te ingarel Oleskoro krsto.

²²Hem angele ko than Golgota, so značinela Than e Čerepeskoro. ²³Hem denale sine mol smirnaja, ama Ov na primingja.

²⁴Palo odova raspningele hem razdelinge Oleskere šeja, frdibaja žrepka baši olenge, koj so te lel.

²⁵A sine trito saati, koga raspningele. ²⁶Hem sine pišimo natpis, so označinela Oleskiri vina:

„JUDEJSKO CARO.“

²⁷Hem Oleja raspninge duj razbojnikja: jek tari desno, a jek tari levo, uzi Leste. ²⁸Hem pherdilo o Sveto Pismo kova vakjerela: ‘Hem gengele maškar o bilačhe.’

²⁹A okola so nakhena sine hulinenale sine, iranibaja pumare šere hem vakjeribaja: „Ua! Tu so rušineja o Hrami hem dzidinejale baši trin dive, ³⁰spasintu Tut hem huli taro krsto!“

³¹Slično lelele ko majtapi o prvosveštenikja, zaedno e knižnikoncar, vakjeribaja jek javereske: „E javeren spasingja, a Pes našti te spasinel! ³²O Hristos – e Izraeleskoro Caro! Neka hulel akana taro krsto, te dikha hem te poverujna!“ Navredinenale sine hem okola, koj sine raspnime Oleja.

³³A ko šovto saati, ulo karanluko ki celo phuv, dži ko ejnato saati. ³⁴A ko ejnato saati o Isus vikingja silno glasoja: „Ili! Ili! Lama Savahtani!“ – so značinela: ‘Mo Devel, mo Devel, soske mukljan Man!’

³⁵Štom šunge odova, nekoj taro okola, koj tergjona sine odothe vakjerge: „Ekje, vikinelale e Ilija!“

³⁶Hem jek prastandilo hem topingja sungeri ki kiselina, čhigja ki trska hem dengjale te pijel, vakjeribaja: „Muken, te dikha dali ka avel o Ilija te huljavele!“

³⁷O Isus vikingja silno glasoja hem izdivningja. ³⁸Hem e hrameskiri zavesa pharavsalili ko duj, upraldan dži tele.

³⁹A koga dikhlja o rimsko oficeri koj tergjola sine sprotiv Leste, deka agjare izdivningja, vakjergja: „Čače, akava manuš sine Devleskoro Čhavo!“

⁴⁰A duraldan dikhena sine hem romnja, maškar kaste sine i Marija Magdalena, i Marija i daj e tikne Jakoveskiri hem e Josijaskiri, hem i Saloma, ⁴¹koj džana sine pali Leste, koga sine ki Galileja, hem služinena Leske, hem but javera, koj ale Oleja ko Erusalim.

E Isuseskoro parube

⁴²A koga vekje ratilo, soske sine spreminenape, ustvari dive sproti sabota. ⁴³Alo o Josif tari Arimateja, poštojmo sovetniko, koj hem korkori udžarela sine e Devleskoro Carstvo, osmelingjapes hem khugja ko Pilat hem rodingja e Isuseskoro telo.

⁴⁴A o Pilat čudingjapes deka vekje mulo; hem vikingja e rimsko oficere hem pučljale dali mulo odamna. ⁴⁵A štom doznajngja taro rimsko oficeri, dengjale e Josifeske o mulo telo.

⁴⁶Ov kingja leneno platno, huljagjale, pakjargjale ko platno hem čhigjale ko grobo, so sine kjerdo dupka ki karpa, hem navalingja bar anglo udar ko grobo. ⁴⁷A i Marija Magdalena hem i Marija e Josijaskiri dikhle kote tano čhivdo.