Mangena te astaren e Isuse te mudaren

¹A koga o Isus završingja sa odola pouke vakjergja lenge Ple učenikonge: ²„Džanena deka i Pasha tani palo duj dive, hem ka predajnenle e Manušikane Čhave, za da te raspninenle.“

³Togaš o bare sveštenikja hem o narodna starešine khedingepes ko dvoro e prvosveštenikoskoro, koj vikinelape sine Kajafa, ⁴hem dogovoringepes te astarenle e Isuse ko hovajba hem te mudarenle. ⁵Ama vakjerenajne: „Na ko prazniko, za da ma te buninelpes o narodo.“

O pomazanie ki Vitanija

⁶A koga o Isus sine ki Vitanija, ko kher e Simoneske o leprozno, ⁷ali Leske paše džuvli, čareja taro alavastar skapoceno miroja, pa čhorgja upro šero Leske, dži kote bešela sine uzi sofra.

⁸Štom o učenikja dikhle odova, reagiringe holjame hem vakjerge: „Soske tano akava rasturibe? ⁹Soske odova miro šaj sine te ovel bikimo skupo, hem o srebrenikja te denpes lenge e čorolenge!“

¹⁰Ama o Isus halilo odova hem vakjergja lenge: „Soske dosadinena e romnja? Oj kjergja Mange šukar delo, ¹¹soske e čorolen isi tumen sekogaš tumencar, a Mande nae tumen sekogaš; ¹²soske koga oj čhorgja o miro upro Mlo telo, kjergjale odova baši Mlo paruba. ¹³Čače vakjerava tumenge, kote hem te ovel propovedimo o Evangelie ko celo sveto, ka vakjerelpe hem odova so kjergjale oj baši lakoro spomen.

O Juda spreminela te predajnel e Isuse

¹⁴Togaš jek taro Dešuduj Džene koj vikinelapes Juda Iskariotski gelo ko prvosveštenikja ¹⁵hem vakjergja lenge: „So ka den man, za da te predajnavle tumenge?“ A ola predložinge leske trijanda srebrenikja. ¹⁶Hem ottogaš rodela sine šuži prilika za da te predajnele.

I posledno večera

¹⁷A ko prvo dive e Beskvasno marenge, o učenikja ale uza ko Isus hem pučlele: „Kote mangeja te spremina Tuke te ha Pasha?“

¹⁸Ov vakjergja: „Džan ki diz ko odova hem odova manuš hem vakjeren leske: ‘O Učiteli vakjerela: „Mlo vreme tano paše; ki tute ka slavinav i Pasha Mle učenikoncar.“’“ ¹⁹Hem o učenikja kjerge sar so zapovedingja lenge o Isus, hem spreminge i Pasha.

²⁰A koga ratilo, Ov bešlja danindor e dešuduje učenikoncar ki sofra. ²¹Hem dži kote hana sine vakjergja lenge: „Čače vakjerava tumenge, deka jek tumendar ka predajnel Man.“

²²Hem but rastužingepes hem počminge te kjeren lafi jek palo jek: „Te na sijum me, Gospodar?“

²³A Ov odgovoringja: „Okova so ka bolel Mancar po vas ki činija, ov ka predajnel Man! ²⁴Hem agjar, o Manušikano Čhavo džala peske sar soj tano pišimo baši Leske, ama teško odole manušeske, preku kaste ka ovel predajmo o Manušikano Čhavo; šukar bi ovela sine baši odova manuš ako na bijangjovela sine!“

²⁵A o Juda, koj predajngjale, ko odgovor vakjergja: „Te na sijum me, Učitele?“
Vakjergja leske: „Tu vakjergjan!“

²⁶A koga hana sine, o Isus lelja maro, blagoslovingjale, phagljale hem lenge razdelingjale e učenikonge, hem vakjergja: „Len, han, akavaj tano Mlo telo.“

²⁷Togaš lelja i čaša hem zablagodaringja, dengjala lenge hem vakjergja: „Pijen sarine olatar, ²⁸soske akavaj tano Mlo rat e Zaveteskoro, kova thavdela baši bute dženenge baši oprostiba e grevonge. ²⁹Ama vakjerava tumenge, otakana nae te pijav taro akava plodi tari loza dži ko odova dive, koga ka pijavle tumencar nevo ko Carstvo Mle Dadeskoro.“

³⁰Hem otkoga giljage blagodarno gili, iklile ki Maslinova Gora.

³¹Togaš o Isus vakjergja lenge: „Sarine tumen ka soblazninen tumen ki Mande, ki akaja rat, soske tano pišimo:

‘Ka khuvav e Pastire
hem o bakhre taro stado ka našen!’

³²A palo Mlo voskresenie ka džav angleder tumende, ki Galileja.“

³³Togaš o Petar odgovoringja hem vakjergja: „Ako sarine soblazninenapes ki Tute, me nikogaš nae te soblazninav man.“

³⁴O Isus vakjergja leske: „Čače vakjerava tuke, panda erat trin puti ka odrečine tut Mandar, angleder te bašel o bašno.“

³⁵O Petar vakjergja Leske: „Ako trebela hem te merav Tuja, nae te odrečinav man Tutar.“ Agjar vakjerge hem sa o učenikja.

³⁶Togaš o Isus alo olencar ko than, kova vikinelapes Getsemanija, hem vakjergja lenge e učenikonge: „Bešen akate dži kote Me džava okorik te molinav Man.“

³⁷Hem lelja Peja e Petare hem e duje Zavedeskere čhaven hem počmingja te tugujnel hem te voznemirinelpes. ³⁸Togaš vakjergja lenge: „Mli duša tani hor ma-zmi dži ko meriba; ačhoven akate hem oven džangavde Mancar!“

³⁹Hem gelo hari poadari hem pelo ko kočaka ničkum mujeja hem molingjapes, vakjeribaja: „Mo Dat! Akoj tano možno, neka nakhel Man akaja čaša; ama na sar so mangava Me, nego sar Tu!“

⁴⁰Hem alo uzo učenikja, hem arakhljalen sar so sovena, hem vakjergja e Petareske: „Agjar! Našti li sine te oven džangavde Mancar jek saati? ⁴¹Oven džangavde hem molinen tumen, za da ma te peren ko iskušenie! O duho mangela te kjerel, ama o telo tano slabo!“

⁴²Palem o dujto puti gelo hem molingjapes, vakjeribaja: „Mo Dat! Ako nae tano možno te nakhel Man akaja čaša, te na pijavla, neka ovel Ti vojlja.“ ⁴³Hem koga alo palem arakhljalen sar so sovena, soske o jajkha lengere sine phanljona.

⁴⁴Hem palem mukljalen hem gelo te molinelpes, trito puti, hem vakjergja o ista lafia. ⁴⁵Togaš alo uzo učenikja hem vakjergja lenge: „Samo soven hem odmorinen. Ekje, alo paše o saati koga o Manušikano Čhavo ka ovel predajmo ko vasta e grešnikonge. ⁴⁶Ušten, te dža! Ekje alo paše Mlo predavniko.“

⁴⁷Hem dži kote Ov panda kjerela sine lafi, ekje o Juda, jek taro Dešuduj Džene, alo bute dženencar, čhurikencar hem kaštencar, bičhalde taro prvosveštenikja hem o narodna starešine.

⁴⁸A Oleskoro predavniko sine dengjalen znako, vakjeribaja: „Kas so ka čuminav me – Ovi tano, astarenle!“ ⁴⁹Hem odma alo paše dži ko Isus hem čumingjale.

⁵⁰A o Isus vakjergja leske: „Amala, soske aljan?“ Togaš ale leske, čhige pe vasta ko Isus hem astargele. ⁵¹Hem ekje, jek taro okola koj sine e Isuseja, ikalgja čhurik hem khugjale e sluga e prvosveštenikoskere hem čhingja o kan leskoro.

⁵²Togaš o Isus vakjergja leske: „Iran tli čhurik ko lakoro than; soske sarine, koj astarenapes ki čhurik – tari čhurik ka mudargjoven. ⁵³Ili mislineja deka našti te molinavle Me Dade, hem ka bičhalel Mange odma poviše taro dešuduj legie angejlja? ⁵⁴Ama, sar bi ispolningjoven o Pismia, deka agjar trebela te ovel?“

⁵⁵Ko odova saati, o Isus vakjergja e narodoske: „Iklilen sar razbojnikoske, čhurikencar hem kaštencar, za da te astaren Man. Sekova dive bešljum ko Hrami hem poučingjum hem na astargen Man. ⁵⁶A akava sa ulo, za da te ispolninenpes o proročka Pismia.“ Togaš sa o učenikja muklele hem našle.

O Isus anglo o Sinedrioni

⁵⁷A odola, koj astargele e Isuse, ingargele ko prvosvešteniko o Kajafa, kote sine khedime o knižnikja hem o starešine. ⁵⁸A o Petar džala sine pali Leste duraldan dži ko dvoro e prvosveštenikoskoro, hem otkoga khugja andre, bešlja e slugencar, za da te dikhel o krajo.

⁵⁹A o glavna sveštenikja hem o celo Sinedrioni rodena sine hovavno svedoštvo protiv o Isus, za da te mudarenle, ⁶⁰hem na arakhle, iako ale but hovavne svedokja. Najposle ale duj džene ⁶¹hem vakjerge: „Akava vakjergja: ‘Šaj te rušinav e Devleskoro Hrami hem te dzidinavle trine divenge.’“

⁶²Togaš o prvosvešteniko uštilo hem vakjergja Leske: „Ništo li na odgovorineja? So svedočinena akala protiv Tute?“

⁶³A o Isus kjutinela sine.
O prvosvešteniko vakjergja Leske: „Dava tut sovli ko dživdo Devel te vakjere amenge dali sijan Tu o Hristos, e Devleskoro Čhavo!“

⁶⁴O Isus vakjergja leske: „Tu vakjergjan! Ama, Me vakjerava tumenge: otakana ka dikhenle e Manušikane Čhave, sar bešela desno e Silatar hem sar avela ko nebesna oblakja.“

⁶⁵Togaš o prvosvešteniko pharagja ple šeja hem vakjergja: „Hulinelale e Devle! Soske potrebno amenge panda svedokja? Ekje, akana šungen i hula! ⁶⁶So mislinena?“
A ola odgovoringe hem vakjerge: „Zaslužinela meribe!“

⁶⁷Togaš čhungargele ko muj hem khuvenale sine boksencar, a javera khuvenale sine šamarke, ⁶⁸vakjerenajne Leske: „Prorokujn, Hriste, koj khugja Tut?“

⁶⁹A o Petar bešela sine avrijal ko dvoro. Hem jek sluginka ali ki leste hem vakjergja leske: „Hem tuda sijan sine e Galilejcoja o Isus!“

⁷⁰A ov odrečingjapes anglo sarine, vakjeribaja: „Na džanava so vakjereja!“

⁷¹A koga iklilo anglo glavno vlez, dikhljale javer hem vakjergja lenge odolenge, koj sine odothe: „Hem akava sine e Nazarecoja o Isus.“

⁷²Ov palem odrečingjapes sovljaja: „Na džanava e Manuše.“

⁷³Hari palo odova ale leske paše okola, koj tergjovena sine, hem vakjerge e Petareske: „Čače, hem tuda sijan olendar, soske hem tlo govor izdajnela tut.“

⁷⁴Togaš počmingja te prokolninelpes hem te delpes sovli: „Na džanavale e Manuše.“

⁷⁵Hem odma bašlja o bašno. Togaš o Petar setingjapes e Isuseske ko lafia so vakjergjalen leske: „Pred te bašel o bašno, trin puti ka odrečine tut Mandar.“ Hem iklilo avrijal hem but rungja.