Параболе

¹Хем палем почминѓа те поучинел узо море. Хем кхедингепес околу Лесте бут народо, аѓар со кхуѓа ко броди хем бешела сине ко море, а цело народо сине ки пхув, узо море.

²Хем сикавелален сине бут параболенцар; хем ваќерѓа ленге ки Пли поука: ³„Шунен! Еќе, иклило сејачи те сејнел. ⁴Хем кога сејнела сине, јек зрно пело узо друмо, хем але о чирикља хем халеле.

⁵Јавер пело ки барали пхув, коте на сине бут пхув; хем барило сигате, соске на сине хор и пхув. ⁶А кога о кхам изгрејнѓа, овенинѓа, хем соске на сине корено шукило.

⁷Хем јавер пело ко каре, хем о каре бариле хем загушингеле, па на анѓа плоди.

⁸А јавер пело ки шукар пхув хем анѓа плоди, кој напредујнела сине хем бајрола сине, хем принесинѓа: јек тријанда, хем о јавер шовардеш, а јавер шел.“

⁹Хем ваќерѓа: „Кас иси кана те шунел, нека шунел!“

¹⁰А кога ачхило Коркори, пучлеле баши и парабола окола, кој сине околу Лесте е Дешудује Џененцар.

¹¹Хем ваќерѓа ленге: „Туменге тани денди и тајна е Девлескере Царствоскири, а околенге кој тане авријал, са овела ко параболе, ¹²баши

‘дикхиндор те дикхен хем те на дикхен;
хем шуниндор те шунен, а те на хајљовен,
за да ма те покајненпес
хем те на овел ленге опростимо.’“

¹³Хем ваќерѓа ленге: „На хајљовена ли акаја приказна? А сар ка хајљовен са о параболе!

¹⁴О сејачи сејнела о слово. ¹⁵Одола, узо друмо, коте со сејнелапес о слово, тале одола касте кој кога ка шунен – одма авела о сатана хем лелале лендар хем легарелале о слово, посејмо ки оленде.

¹⁶Исто, о сејме упри барали пхув тале одола, кој – штом шунена о слово - приминенале радостеја, ¹⁷ама наелен ки песте корено, него привремена тане, хем кога ка авел невоља или гониба баши о слово, одма соблазниненапес.

¹⁸А о јавера, сој тане сејме ко каре, одолај тане окола, кој шунге о слово, ¹⁹ама о светска гриже, хем о ховајба е барвалипаскоро, хем о желбе баши јавера буќа, кога ка кхувен загушиненале е слово, хем ачхола бизо плоди.

²⁰А о сејме ки шукар пхув тале одола, кој шунена о слово, приминенале хем анена плоди: јек тријанда, хем јек шовардеш, хем јек шел.“

²¹Продолжинѓа о Исус ваќерѓа ленге: „Зарем и момоли тхарелапе за да те учхарелпе капакоја, или пак те чхивелпес тело кревети? Зарем на тхарелапе за да те чхивелпес ко светилнико? ²²Соске ништо нае тано гаравдо, со нае те овел откримо; или сој тано тајно ќердо, а те на иклол ко видело.

²³Кас иси кана те шунел, нека шунел!“

²⁴Хем ваќерѓа ленге: „Пазинен со шунена! Саве мераја меринена, асавкаја ка меринелпес туменге, хем ка предодајнелпес туменге, кој шунена. ²⁵Соске кас иси, ка делпес леске; а кас нае, ка лелпес лестар хем одова со исиле.“

²⁶Хем ваќерела сине: „Аѓар, е Девлескоро Царство тано сар кога мануш ка фрдел семе ки пхув; ²⁷хем совела хем уштела раќате хем о диве, а о семе никнонела хем бајрола, а коркори на џанела сар. ²⁸И пхув коркори пестар анела плоди, најангледер стебло, после класи – пало одова класи пхердо зрнонцар. ²⁹А кога о плоди ресљола, одма бичхавела српа, соске ули жетва.“

³⁰Хем ваќерела сине: „Солеја те спорединав е Девлескоро Царство? Саве параболаја те преставинале? ³¹Одовај тано сар синапово зрно, со кога сејнелапес ки пхув, тано потикно таро са о семиа ки пхув; ³²ама кога тано посејмо, бајрола хем овела побаро таро са о зеленчуќа хем мукела баре гранке, аѓар со о небесна чирикља шај те ќерен јуве тели олескири сенка.“

³³Буте асавке параболенцар ваќерела сине о слово ленге, кобор со шај те шунен. ³⁴А бизо параболе ништо на ваќерела сине ленге, ама насамо објаснинела сине ленге са Пле учениконге.

О Исус чхинавела и бура

³⁵Хем раќакоро ко исто диве ваќерѓа ленге: „Те накха тари јавер страна.“ ³⁶Хем кога мукле е народон леле е Исусе пеја, сар со сине ко броди; хем јавера бродиа сине Олеја.

³⁷Хем уштили силно бура, а о брајна префрлиненапес сине ко броди, аѓар со о броди веќе пхерѓола сине. ³⁸А Ов узо кормило совела сине ко јастуко. Хем ваздингеле хем ваќерге Леске: „Учителе, зар нае туке грижа, со амен мераја?“

³⁹Хем уштило, заканинѓапес е бавлалаке хем ваќерѓа е мореске: „Чхинав! Ќутин!“ Хем и бавлал чхинаѓа хем ули бари тишина.

⁴⁰Хем ваќерѓа ленге: „Соске дарана добором? Сар нае тумен вера?“

⁴¹Хем астарѓален бари дар, хем ваќерена сине јек јавереске: „Кој тано Акава, со хем и бавлал хем о море покориненапес Леске?“