О обичаја е пхуренгере

¹Тогаш о фарисеа хем о книжниќа, таро Ерусалим, але ко Исус хем ваќерге Леске: ²„Соске Те учениќа пхагена о обичај е пхуренгоро? Соске на тховена пе васта, кога хана маро.“

³А Ов ко одговор ваќерѓа ленге: „Соске хем туменда пхагена е Девлескири заповед, баши тумаро обичај? ⁴Соске о Девел ваќерѓа: ‘Поштојн те даде хем те даја,’ хем ‘Кој лошно ваќерела пе дадеске или пе дајаке, те казнинелпес мерибаја;’ ⁵а тумен ваќерена: ‘кој ка ваќерел пе дадеске или пе дајаке: Одова солеја би шај те користине мандар, подаримој тано е Девлеске,’ ⁶ов на требела те дел пе дадеске или пе дајаке; хем аѓар чхинаген е Девлескоро лафи баши тумаро обичај. ⁷Лицемејра! Шукар о Исаија пророкујнела сине баши туменге, ваќерибаја:

⁸‘Акава народо поштојнела Ман мујеја,
а оленгоро срце тано дур Мандар.
⁹Ама ко чучо поклониненапес Манге,
сикљона науке, сој тане манушикане заповедиа.’“

¹⁰Хем повикујнѓа е народон хем ваќерѓа ленге: „Шунен хем хајљовен! ¹¹На одова, со кхувела ко муј онечистинела е мануше. Него окова со икљовела таро муј, одова онечистинела е мануше.“

¹²Тогаш о учениќа приближисалиле Леске хем ваќерге: „Џанеја ли, дека о фарисеа соблазнингепес кога шунге одова лафи?“

¹³А Ов одговоринѓа хем ваќерѓа: „Секова садимо, со на садинѓале Мло небесно Дат, ка овел откорнимо. ¹⁴Мукенлен. Олај тане короле водачиа е короленгере; а ако короло водинела короле, солдуј ка перен ки дупка.“

¹⁵А о Петар одговоринѓа хем ваќерѓа Леске: „Објаснин аменге и парабола.“

¹⁶А о Исус ваќерѓа ленге: „Хем туменда ли панда сијен бизо те хајљовен? ¹⁷На хајљовена ли дека са со кхувела ко муј џала ко воги хем изфрделапе авријал? ¹⁸А окова, со икљовела таро муј, икљола таро срце, хем одова онечистинела е мануше. ¹⁹Соске таро срце икљовена: билачхе мисле, убиство, прељуба, блудства, чориба, ховавне сведоштва, хуле. ²⁰Одола буќај тане кој онечистинена е мануше. А о хајбе битховде вастенцар на онечистинела е мануше.“

И вера тари јек Хананејка

²¹Хем откога иклило одотхар, о Исус повлечинѓапе ко краја ко Тир хем Сидон. ²²Хем еќе, џувли Хананејка, иклили таро окола краја хем викинѓа ки Лесте, ваќерибаја: „Смилујн Тут манге, Господар, Чхаво Давидескоро! Мли чхај тани билачхе опседними таро демони.“

²³Ама Ов на одговоринѓа лаке ни лафи. Хем приближиненапес сине Леске, Олескере учениќа молиненајнеле, ваќерибаја: „Мукла, соске викинела пали аменде.“

²⁴Ама Ов одговоринѓа хем ваќерѓа: „Ме на сијум бичхавдо, освен ко нашавде бакхре ко кхер ко израелско.“

²⁵Ој али палем хем поклонинелапес Леске, ваќерибаја: „Господар, поможин ман!“

²⁶А Ов одговоринѓа хем ваќерѓа: „Нае тано шукар те лелпес о маро е чхавенгоро хем те фрделпес е џуќеленге.“

²⁷Ама ој ваќерѓа: „Оја, Господар, ама чак хем о џуќела хана таро трошке, со перена тари софра оленгере господаренгири.“

²⁸Тогаш о Исус одговоринѓа хем ваќерѓа: „О, ромније, бари тани тли вера: нека овел туке пали тли желба.“ Хем лакири чхај сине исцелими таро одова сaати.

О Исус паравела штар илјаде манушен

²⁹Хем откога гело песке одотхаре, о Исус ало узо море Галилејско, уклило ки гора хем бешља одотхе. ³⁰Хем але ки Лесте баро народо, кој синелен пеја: банге, короле, лалоре, сакатиа хем бут јавера, хем чхигелен англо е Исусескере пре, хем Ов сасќарѓален, ³¹аѓар со о народо чудингепе сар дикхена о лалоре те ќерен лафи, о сакатиа састе, о банге те пхирен хем о короле те дикхен; хем прославинге е Девле о израелско.

³²А о Исус повикујнѓа Пле ученикон ки Песте, хем ваќерѓа: „Пхердо сијум ки жал баши о народо, соске веќе трин диве ачхиле Манцар хем наелен со те хан; а на мангава те мукавлен бокхале, за да ма те чхинѓовен ко друмо.“

³³Хем о учениќа Олескере ваќерге Леске: „Котар аменге ки пустина добокхар маро, за да те парава добокхар баро народо?“

³⁴Хем о Исус ваќерѓа ленге: „Кобор маре иси тумен?“ Ола ваќерге: “Евта хем некобор мачхе.“

³⁵Хем заповединѓа е народоске те бешен ки пхув; ³⁶леља о евта маре хем о мачхе, благодаринѓа хем пхагљален; хем денѓа е учениконге, а о учениќа е народоске.

³⁷Хем сарине хале хем чалиле; хем ваздинге со ачхило таро котора, евта корпе пхерде. ³⁸А одола, кој хале, сине штар илјаде мурша, освен о џувља хем о чхаве.

³⁹Хем штом мукљален е народон, кхуѓа ко броди, хем ало ко предејља ки Магдала.