О Христос преобразинелапе

¹Хем пало шов диве о Исус леља Пеја: е Петаре, хем е Јакове хем о пхрал лескоро о Јован, хем ингарѓален ки учи гора насамо. ²Хем сине преобразимо англо ленде, о лико Олескоро светинѓа сар кхам, а Олескере шеја уле парне сар и светлина. ³Хем еќе, јавинѓапес ленге о Мојсеј хем о Илија хем ќерге лафи Олеја.

⁴А о Петар одговоринѓа хем ваќерѓа е Исусеске: „Господар, шукари тано баши аменге те ова акате; ако мангеја ка ќера акате трин шатојра: јек баши Туке, јек баши о Мојсеј хем јек баши о Илија.“

⁵Џи коте панда ќерела сине лафи ов, еќе, упра ленде светло облако, хем еќе, гласо таро облако ваќерела сине: „Акавај тано Мло мангло Чхаво, ки Касте Ми милина тани; шунен Оле!“ ⁶Хем кога о учениќа шунге одова, пеле мујеја ничкум хем бут дарандиле.

⁷А о Исус ало узо ленде паше, допринѓален хем ваќерѓа: „Уштен хем ма даран!“ ⁸Хем кога ола ваздинге пе јаќа, на дикхле никас, освен е Исусе Коркори.

⁹Хем кога хулиле тари гора, о Исус заповединѓа ленге, ваќерибаја: „Никаске ма ваќерен баши акава привидение, џи коте о Чхаво Манушикано на воскреснинела таро муле.“

¹⁰Хем Олескере учениќа пучлеле, ваќерге: „Соске тогаш о книжниќа ваќерена, дека о Илија англедер мора те авел?“

¹¹А Ов одговоринѓа ленге хем ваќерѓа: „Чаче о Илија авела хем ка обновинел са. ¹²Ама, ваќерава туменге, дека о Илија веќе ало, хем на пенџаргеле, него ќерге леске сар со мангле. Аѓар хем о Чхаво Манушикано ка цидел олендар.“

¹³Тогаш о учениќа халиле дека ваќерела сине ленге баши о Јован Крстител.

О сасќариба е демонско месечаре

¹⁴Хем кога але ко народо јек мануш ало Леске, пело ко кочиа англо Лесте хем ваќерѓа: ¹⁵„Господар, смилујн Тут мле чхавеске, соске тано месечари хем мучинелапес бут; соске често перела ки јаг хем често ко пани. ¹⁶Хем анѓумле ко Тле учениќа, а ола нашти сине те сасќаренле.“

¹⁷Хем о Исус одговоринѓа хем ваќерѓа: „О, неверно хем развратно родо! Џи кога ка овав туменцар? Џи кога ка трпинав тумен? Аненле Манге акате.“ ¹⁸Хем о Исус прекоринѓале, хем иклило о демони олестар, хем о чхаво сине састило таро одова саати.

¹⁹Тогаш о учениќа але узо Исус коркори хем ваќерге: „Соске нашти сине амен те палдале?“

²⁰А Ов ваќерѓа ленге: „Баши тумаро неверие; соске чаче ваќерава туменге, ако иси тумен вера кобор о синапово зрно, ка ваќерен акале гораке: ‘Преместин тут акатар одори!’, хем ка преместинелпес, хем ништо нае те овел туменге невозможно. ²¹А акаја врста на икљола освен преку молитва хем постиба.“

О Исус ваќерела баши Пло мерибе хем воскресение

²²Хем џи коте сине заедно ки Галилеја, о Исус ваќерѓа ленге: „О Чхаво Манушикано ка овел предајмо ко васта манушикане, ²³хем ка мударенле, хем ко трито диве ка овел воскреснимо.“ Хем ола бут нажалисалиле.

²⁴А кога але ко Капернаум, окола со кхедена дуј драхме е храмеске даноко, але е Петареске хем ваќерге: „Зарем тумаро Учители на платинела дуј драхме?“

²⁵Ов ваќерѓа: „Оја.“ Хем кога кхуѓа ко кхер о Исус предвидинѓале хем ваќерѓа: „Со мислинеја, Симон: е пхувјакере цајра кастар лена царина или данок, таро пле чхаве или таро јабанџие?“

²⁶А о Петар ваќерѓа Леске: „Таро јабанџие.“ О Исус ваќерѓа леске: „Значи, о чхаве тане слободна. ²⁷Ама за да ма те соблазнинален, џа џи ко море, фрде јадица хем ле о прво мачхо со ка икљол, хем кога ка пхраве о муј лескоро, ка аракхе статир*; леле хем делен ленге баши Манге хем баши туке.“

*Стихо 27: Статир тано јек врста железна паре.