Мангена те астарен е Исусе те мударен

¹А кога о Исус завршинѓа са одола поуке ваќерѓа ленге Пле учениконге: ²„Џанена дека и Пасха тани пало дуј диве, хем ка предајненле е Манушикане Чхаве, за да те распниненле.“

³Тогаш о баре свештениќа хем о народна старешине кхедингепес ко дворо е првосвештеникоскоро, кој викинелапе сине Кајафа, ⁴хем договорингепес те астаренле е Исусе ко ховајба хем те мударенле. ⁵Ама ваќеренајне: „На ко празнико, за да ма те бунинелпес о народо.“

О помазание ки Витанија

⁶А кога о Исус сине ки Витанија, ко кхер е Симонеске о лепрозно, ⁷али Леске паше џувли, чареја таро алавастар скапоцено мироја, па чхорѓа упро шеро Леске, џи коте бешела сине узи софра.

⁸Штом о учениќа дикхле одова, реагиринге хољаме хем ваќерге: „Соске тано акава растурибе? ⁹Соске одова миро шај сине те овел бикимо скупо, хем о сребрениќа те денпес ленге е чороленге!“

¹⁰Ама о Исус халило одова хем ваќерѓа ленге: „Соске досадинена е ромња? Ој ќерѓа Манге шукар дело, ¹¹соске е чоролен иси тумен секогаш туменцар, а Манде нае тумен секогаш; ¹²соске кога ој чхорѓа о миро упро Мло тело, ќерѓале одова баши Мло паруба. ¹³Чаче ваќерава туменге, коте хем те овел проповедимо о Евангелие ко цело свето, ка ваќерелпе хем одова со ќерѓале ој баши лакоро спомен.

О Јуда спреминела те предајнел е Исусе

¹⁴Тогаш јек таро Дешудуј Џене кој викинелапес Јуда Искариотски гело ко првосвештениќа ¹⁵хем ваќерѓа ленге: „Со ка ден ман, за да те предајнавле туменге?“ А ола предложинге леске тријанда сребрениќа. ¹⁶Хем оттогаш родела сине шужи прилика за да те предајнеле.

И последно вечера

¹⁷А ко прво диве е Бесквасно маренге, о учениќа але уза ко Исус хем пучлеле: „Коте мангеја те спремина Туке те ха Пасха?“

¹⁸Ов ваќерѓа: „Џан ки диз ко одова хем одова мануш хем ваќерен леске: ‘О Учители ваќерела: „Мло време тано паше; ки туте ка славинав и Пасха Мле учениконцар.“’“ ¹⁹Хем о учениќа ќерге сар со заповединѓа ленге о Исус, хем спреминге и Пасха.

²⁰А кога ратило, Ов бешља даниндор е дешудује учениконцар ки софра. ²¹Хем џи коте хана сине ваќерѓа ленге: „Чаче ваќерава туменге, дека јек тумендар ка предајнел Ман.“

²²Хем бут растужингепес хем почминге те ќерен лафи јек пало јек: „Те на сијум ме, Господар?“

²³А Ов одговоринѓа: „Окова со ка болел Манцар по вас ки чинија, ов ка предајнел Ман! ²⁴Хем аѓар, о Манушикано Чхаво џала песке сар сој тано пишимо баши Леске, ама тешко одоле манушеске, преку касте ка овел предајмо о Манушикано Чхаво; шукар би овела сине баши одова мануш ако на бијанѓовела сине!“

²⁵А о Јуда, кој предајнѓале, ко одговор ваќерѓа: „Те на сијум ме, Учителе?“
Ваќерѓа леске: „Ту ваќерѓан!“

²⁶А кога хана сине, о Исус леља маро, благословинѓале, пхагљале хем ленге разделинѓале е учениконге, хем ваќерѓа: „Лен, хан, акавај тано Мло тело.“

²⁷Тогаш леља и чаша хем заблагодаринѓа, денѓала ленге хем ваќерѓа: „Пијен сарине олатар, ²⁸соске акавај тано Мло рат е Заветескоро, кова тхавдела баши буте џененге баши опростиба е гревонге. ²⁹Ама ваќерава туменге, отакана нае те пијав таро акава плоди тари лоза џи ко одова диве, кога ка пијавле туменцар нево ко Царство Мле Дадескоро.“

³⁰Хем откога гиљаге благодарно гили, иклиле ки Маслинова Гора.

³¹Тогаш о Исус ваќерѓа ленге: „Сарине тумен ка соблазнинен тумен ки Манде, ки акаја рат, соске тано пишимо:

‘Ка кхував е Пастире
хем о бакхре таро стадо ка нашен!’

³²А пало Мло воскресение ка џав англедер туменде, ки Галилеја.“

³³Тогаш о Петар одговоринѓа хем ваќерѓа: „Ако сарине соблазниненапес ки Туте, ме никогаш нае те соблазнинав Ман.“

³⁴О Исус ваќерѓа леске: „Чаче ваќерава туке, панда ерат трин пути ка одречине тут Мандар, англедер те башел о башно.“

³⁵О Петар ваќерѓа Леске: „Ако требела хем те мерав Туја, нае те одречинав ман Тутар.“ Аѓар ваќерге хем са о учениќа.

³⁶Тогаш о Исус ало оленцар ко тхан, кова викинелапес Гетсеманија, хем ваќерѓа ленге е учениконге: „Бешен акате џи коте Ме џава окорик те молинав Ман.“

³⁷Хем леља Пеја е Петаре хем е дује Заведескере чхавен хем почминѓа те тугујнел хем те вознемиринелпес. ³⁸Тогаш ваќерѓа ленге: „Мли душа тани хор ма-зми џи ко мериба; ачховен акате хем овен џангавде Манцар!“

³⁹Хем гело хари поадари хем пело ко кочака ничкум мујеја хем молинѓапес, ваќерибаја: „Мо Дат! Акој тано можно, нека накхел Ман акаја чаша; ама на сар со мангава Ме, него сар Ту!“

⁴⁰Хем ало узо учениќа, хем аракхљален сар со совена, хем ваќерѓа е Петареске: „Аѓар! Нашти ли сине те овен џангавде Манцар јек саати? ⁴¹Овен џангавде хем молинен тумен, за да ма те перен ко искушение! О духо мангела те ќерел, ама о тело тано слабо!“

⁴²Палем о дујто пути гело хем молинѓапес, ваќерибаја: „Мо Дат! Ако нае тано можно те накхел Ман акаја чаша, те на пијавла, нека овел Ти војља.“ ⁴³Хем кога ало палем аракхљален сар со совена, соске о јајкха ленгере сине пханљона.

⁴⁴Хем палем мукљален хем гело те молинелпес, трито пути, хем ваќерѓа о иста лафиа. ⁴⁵Тогаш ало узо учениќа хем ваќерѓа ленге: „Само совен хем одморинен. Еќе, ало паше о саати кога о Манушикано Чхаво ка овел предајмо ко васта е грешниконге. ⁴⁶Уштен, те џа! Еќе ало паше Мло предавнико.“

⁴⁷Хем џи коте Ов панда ќерела сине лафи, еќе о Јуда, јек таро Дешудуј Џене, ало буте џененцар, чхурикенцар хем каштенцар, бичхалде таро првосвештениќа хем о народна старешине.

⁴⁸А Олескоро предавнико сине денѓален знако, ваќерибаја: „Кас со ка чуминав ме – Ови тано, астаренле!“ ⁴⁹Хем одма ало паше џи ко Исус хем чуминѓале.

⁵⁰А о Исус ваќерѓа леске: „Амала, соске аљан?“ Тогаш але леске, чхиге пе васта ко Исус хем астаргеле. ⁵¹Хем еќе, јек таро окола кој сине е Исусеја, икалѓа чхурик хем кхуѓале е слуга е првосвештеникоскере хем чхинѓа о кан лескоро.

⁵²Тогаш о Исус ваќерѓа леске: „Иран тли чхурик ко лакоро тхан; соске сарине, кој астаренапес ки чхурик – тари чхурик ка мударѓовен. ⁵³Или мислинеја дека нашти те молинавле Ме Даде, хем ка бичхалел Манге одма повише таро дешудуј легие ангејља? ⁵⁴Ама, сар би исполнинѓовен о Писмиа, дека аѓар требела те овел?“

⁵⁵Ко одова саати, о Исус ваќерѓа е народоске: „Иклилен сар разбојникоске, чхурикенцар хем каштенцар, за да те астарен Ман. Секова диве бешљум ко Храми хем поучинѓум хем на астарген Ман. ⁵⁶А акава са уло, за да те исполниненпес о пророчка Писмиа.“ Тогаш са о учениќа муклеле хем нашле.

О Исус англо о Синедриони

⁵⁷А одола, кој астаргеле е Исусе, ингаргеле ко првосвештенико о Кајафа, коте сине кхедиме о книжниќа хем о старешине. ⁵⁸А о Петар џала сине пали Лесте дуралдан џи ко дворо е првосвештеникоскоро, хем откога кхуѓа андре, бешља е слугенцар, за да те дикхел о крајо.

⁵⁹А о главна свештениќа хем о цело Синедриони родена сине ховавно сведоштво против о Исус, за да те мударенле, ⁶⁰хем на аракхле, иако але бут ховавне сведоќа. Најпосле але дуј џене ⁶¹хем ваќерге: „Акава ваќерѓа: ‘Шај те рушинав е Девлескоро Храми хем те ѕидинавле трине дивенге.’“

⁶²Тогаш о првосвештенико уштило хем ваќерѓа Леске: „Ништо ли на одговоринеја? Со сведочинена акала против Туте?“

⁶³А о Исус ќутинела сине.
O првосвештенико ваќерѓа Леске: „Дава тут совли ко џивдо Девел те ваќере аменге дали сијан Ту о Христос, е Девлескоро Чхаво!“

⁶⁴О Исус ваќерѓа леске: „Ту ваќерѓан! Ама, Ме ваќерава туменге: отакана ка дикхенле е Манушикане Чхаве, сар бешела десно е Силатар хем сар авела ко небесна облаќа.“

⁶⁵Тогаш о првосвештенико пхарaѓа пле шеја хем ваќерѓа: „Хулинелале е Девле! Соске потребно аменге панда сведоќа? Еќе, акана шунген и хула! ⁶⁶Со мислинена?“
А ола одговоринге хем ваќерге: „Заслужинела мерибе!“

⁶⁷Тогаш чхунгаргеле ко муј хем кхувенале сине боксенцар, а јавера кхувенале сине шамарке, ⁶⁸ваќеренајне Леске: „Пророкујн, Христе, кој кхуѓа Тут?“

⁶⁹А о Петар бешела сине авријал ко дворо. Хем јек слугинка али ки лесте хем ваќерѓа леске: „Хем туда сијан сине е Галилејцоја о Исус!“

⁷⁰А ов одречинѓапес англо сарине, ваќерибаја: „На џанава со ваќереја!“

⁷¹А кога иклило англо главно влез, дикхљале јавер хем ваќерѓа ленге одоленге, кој сине одотхе: „Хем акава сине е Назарецоја о Исус.“

⁷²Ов палем одречинѓапес совљаја: „На џанава е Мануше.“

⁷³Хари пало одова але леске паше окола, кој терѓовена сине, хем ваќерге е Петареске: „Чаче, хем туда сијан олендар, соске хем тло говор издајнела тут.“

⁷⁴Тогаш почминѓа те проколнинелпес хем те делпес совли: „На џанавале е Мануше.“

⁷⁵Хем одма башља о башно. Тогаш о Петар сетинѓапес е Исусеске ко лафиа со ваќерѓален леске: „Пред те башел о башно, трин пути ка одречине тут Мандар.“ Хем иклило авријал хем бут рунѓа.