О Девел аракхелале околе со надинелапе ки Лесте

¹Ту кој бешеја те гараве тут телал ко покрив е Најбарескоро, со одморинеја тут тели сенка таро Семоќно Кој иќерела са,

²ваќер Леске е Господареске: „Ту Кој сијан мо Тхан е гарајбаскоро! Мли Тврдина! Мо Девел, ки Касте надинава ман!“

³Соске Ов ка ослободинел тут тари стапица е ловџијаскири, тари чума со мангела те уништинел тут.

⁴Ка аракхел тут Пле пакенцар, ка гараве тут телал Олескере пака. Олескоро чачипа тано штити хем аракхела тут!

⁵Нае те дара тари е раќакири дар, ниту тари стрелка со летинела дивеја,

⁶ни тари чума со гаравелапе чојрале таро каранлуко, ни тари зараза со уништинела пусто ќерела палоручко.

⁷Хем нека перен илјада уза туте, деш илјаде џи ки тли десница, ама уза туте нане те авел паше.

⁸Само со ка дикхе те јајкхаја, веќе ка дикхе и плата е грешниконгири.

⁹Соске о Господари тано тло тхан коте со гаравеја тут, избиринѓан е Најбаре, коте ка беше те аракхел тут.

¹⁰Нае те аракхел тут билачхипе, и невоља нае те авел паше џи ко тло шатори.

¹¹Соске ка заповединел Пле ангеленге, те аракхен тут ко са тле друмиа.

¹²Ка ингарен тут ко васта за да те на сопнине тут ко бар.

¹³Те преја ка газине лави хем отровно сап, ка газинелен е тикне лаве хем е сапе.

¹⁴„Ка избавинавле соске мангела Ман, ка аракхавле соске пенџарела Мо анав.

¹⁵Ка викинел Ман, а Ме ка шунавле, олеја ка овав ки невоља, ка спасинавле хем ка прославинавле.

¹⁶Ка чајљаравле буте дивенцар, ка сикавав леске Мо спасение.