1 Јованово 1
О Слово е Животоскоро
1Одова, со сине таро почеток, со шунгем, со дикхлем амаре јајкхенцар, со пажливо преметингем хем со пипингем амаре вастенцар, ќерелапе лафи баши о Слово е Животоскоро– 2хем о живото јавинѓапе, хем амен дикхлемле хем сведочинаја хем објавинаја туменге о вечно живото, Кој сине е Дадеја, хем јавинѓапе аменге– 3одова, со дикхлем хем шунгем, одова објавинаја хем туменге, за да те овел тумен хем туменда заедништво аменцар. А амаро заедништво тано е Дадеја хем Олескере Чхавеја о Исус Христос. 4Амен пишинаја туменге акава, за да те овел тумари радост пхерди.
Те џа пали светлина
5Хем акавај тано о хабери со шунгемле Олестар хем со јавинаја туменге: о Девел тано светлина хем ки Лесте нае нисаво каранлуко. 6Ако ваќераја дека иси амен заедништво Олеја, а џаја ко каранлуко, ховаваја хем на ќераја о чачипе. 7Ако пак џаја ки светлина, сар сој тано Ов коркори ки светлина, иси амен заедништво јек јавереја, хем о рат Олескере Чхавескоро о Исус Христос очистинела амен таро секова грево.
8Ако ваќераја дека нане амен грево, ховаваја амен коркори амен, хем о чачипе нане тано ки аменде. 9Ако признајнаја амаре гревиа, Ови тано верно хем праведно: те опростинел амаре гревиа хем те очистинел амен тари секоја неправедност. 10Ако ваќераја дека на грешингем, Оле ќерајале ховавно, хем Олескоро Слово нае тано ки аменде.