О Христос амаро Застапнико

¹Мле чхавален, акава пишинава туменге за да ма те грешинен; хем ако некој грешинела иси амен Застапнико англа ко Дат: о Исус Христос, о Праведнико. ²Ови тано жртва со помиринѓа баши амаре гревиа; на само амаре, него хем баши о гревиа е цело светоскере.

³Хем пало одова џанаја дека пенџарајале, ако пазинаја Олескере заповедиа. ⁴Кој ваќерела: „Пенџаравале,“ а на пазинела Олескере заповедиа, ховавној тано хем о чачипе нае тано ки лесте. ⁵А кој пазинела Олескоро Слово, ки лесте, чаче, о мангипе ко Девел ресља џи ко совршенство. Пало одова џанаја дека сијем ки Лесте. ⁶Кој ваќерела дека ачхола ки Лесте, ов требела те џал пало одова те ќерел, сар со џала сине хем ќерела Ов.

Неви заповед

⁷Мангљален, на пишинава туменге неви заповед, него и пурани заповед, со сине тумен таро почеток; и пурани заповед тано о слово, со шунгенле. ⁸Ама сепак пишинава туменге неви заповед; хем одовај тано чачутно хем ки Лесте хем ки туменде – соске и темнина накхела, а и чачутни светлина веќе светинела.

⁹Кој ваќерела дека тано ки светлина, а мрзинела пе пхрале, ови тано панда ко каранлуко. ¹⁰Кој мангела пе пхрале ачхола ки светлина хем ки лесте нае ништо со би шај сине некас те чхивел ко грево. ¹¹А кој мрзинела пле пхрале ко каранлуко тано хем ко каранлуко џала, хем на џанела кај џала, соске о каранлуко којрарѓа о јајкха лескере.

¹²Пишинава туменге, чхавален, соске опростиме тане тумаре гревиа, баши Олескоро анав. ¹³Пишинава туменге, дадален, соске пенџарген Околе, Кој тано таро почеток; пишинава туменге, тернален, соске побединген е билачхе. Пишинѓум туменге, чхавален, соске пенџарген е Даде. ¹⁴Пишинѓум туменге, дадален, соске пенџарген Околе, Кој тано таро почеток. Пишинѓум туменге, тернален, соске сијен силна хем соске е Девлескоро Слово ачхола ки туменде, хем соске побединген е билачхе.

Ма манген о свето

¹⁵Ма манген о свето, ниту окова сој тано ко свето. Ако некој мангела о свето, о мангипа таро Девел о Дат нае тано ки лесте, ¹⁶соске са сој тано ко свето - и похота е телоскири, и похота е јајкхенгири хем о барипе е животоскоро - нае тано таро о Дат, него таро свето. ¹⁷А о свето накхела хем олескири похота, а кој ќерела е Девлескири војља ачхола довек.

Баши о антихристиа

¹⁸Чхавален, о последно саати тано; хем сар со шунген дека о антихрист авела, аѓар акана уштиле бут антихристиа; пало одова џанаја дека тано о последно саати. ¹⁹Амендар иклиле, ама на сине амендар, соске ако сине амендар, ка ачховен сине аменцар, него требела сине те сикавелпес дека нае тане сарине амендар.

²⁰А тумен иси тумен помазание таро Окова Кој тано Свето хем џанена са. ²¹На пишинѓум туменге сар те пхене на џанена о чачипа, него соске џанена, хем соске нијек ховајба нае тано таро чачипе. ²²Кој тано о ховавно? Одовај тано окова - кој на мангела те прифатинел дека о Исус тано о Христос. Акавај тано антихрист – кој на прифатинела е Даде хем е Чхаве. ²³Секој кој на прифатинела е Чхаве наеле ни е Даде; кој признајнела е Чхаве, исиле хем е Даде.

Ачховен ко Христос

²⁴Со шунген таро почеток, одова те ачхол ки туменде. Ако ачхола ки туменде окова со шунген таро почеток, хем тумен ка ачховен ко Чхаво хем ко Дат. ²⁵А акавај тано со обечинѓа - Ов обечинѓа аменге вечно живото.

²⁶Акава пишинѓум туменге баши окола, кој ховавена тумен. ²⁷А тумен, со приминген о помазание Олестар ачхола ки туменде, хем нае тано потребно некој те сикавел тумен, него сар со Олескоро помазание сикавела тумен баши о са, хем тано чачутно хем нае тано ховајба, хем сар со сикаѓа тумен, аѓар ачховен ки Лесте. ²⁸Хем акана, чхавален, ачховен ки Лесте, за да те овел амен сигурност хем доверба бизо те дара кога ка јавинелпес Ов, хем за да ма те лаџаќера амен англо Лесте, ко Олескоро ајбе. ²⁹Ако џанена дека Ови тано праведно, џанен дека секој кој ќерела правда, бијамо тано Олестар.