1 Петрово 1

¹О Петар, о апостоли е Исусе Христоскоро, џи ко избириме мануша со живинена ки тугина, сој тане растуриме ко Понт, Галатија, Кападокија, Азија хем Витинија, ²избириме таро о Девел о Дат Кој џанела са англедер, хем осветиме таро Духо, баши те ова послушна хем прскиме е Исусе Христоскере ратеја: и благодат хем о мир те умножинелпе туменге.

Џивди надеж

³Благословимо те овел о Девел о Дат амаре Господарескоро е Исусе Христоскоро, Кој пали Пли бари милост, преку о воскресение е Исусе Христоскоро таро муле, бијанѓа амен поново баши џивди надеж, ⁴баши наследство со на накхела, хем со нае валкајмо, хем кова на шуќола, аракхло баши туменге ко небо, ⁵кас со е Девлескири сила аракхела тумен, преку и вера, баши о спасение, спремимо те откринелпе ко последно време.

⁶Радујнен тумен баши акава, макар аканаске те овен да ки туга, хем ако ваљани, те накхен таро разна искушениа, ⁷та о вредност тари тумари вера, која тани поскапоцено таро пропадливо злато - кова испитинелапе ки јаг - те сикавелпе, баши пофалба, слава хем чест ко откровение е Исусе Христоскоро, ⁸Кас со тумен мангенале е Исусе иако на дикхленле, ки Касте верујнена акана, иако на дикхенале, хем радујнена тумен, добором со нашти те ваќерелпе хем те опишинелпе, радостеја сој пхерди славаја, ⁹соске ресена и цел тумаре веракири: о спасение тумаре душенгоро.

¹⁰Акава спасение родинге хем испитинге о пророќа, кола пророкунге баши и благодат сој тани планирими туменге те делпе. ¹¹О пророќа трудиненапе сине те хајљовен е Христоскоро Духо, Кој сине ки ленде, баши одова со сикавела ленге, баши каске хем ко саво време, кога англедер ваќерела ленге сине баши е Христоскоро цидиба со ка овел хем баши о славе пало одова.

¹²Оленге сине откримо дека на служинена сине баши песке, него баши туменге, адалеjа со акана туменге тано објавимо преку окола со проповединге туменге о Евангелие преку Свети Дух бичхавдо таро небо, ко со о ангејљада мангена те дикхен.

Те ова света

¹³Адалеске, овен спремна гоѓаја, овен трезвена, нека овел тумен пхерди надеж баши и благодат, која со ка овел туменге анди ко откровение е Исусе Христоскоро. ¹⁴Сар послушна чхаве, ма дикхен те живинен сар поангле ко тумаре пуране страстиа, кола сине тумен кога живинена сине ко биџандипе, ¹⁵него сар сој Ов Свето, Кој викинѓа тумен, те овен коркори туменда света ко цело тумаро иќериба, ¹⁶соске тано пишимо, ‘Овен света соске МЕ СИЈУМ свето.’

¹⁷Хем ако викиненале Дат Околе, Кој на дикхела кој тано кој, него судинела спрема о дејља секоле јеке, акате џи коте сијен сар јабанџие, накхенле о време таро тумаро живото ки дар хем ко почит спрема Лесте, ¹⁸џандипаја дека на сијен кинде распадлива буќенцар, среброја или златоја, таро тумаро чучо безвредно живото сој туменге тано предајмо таро тумаре дада, ¹⁹него скапоцено ратеjа таро Христос, сар невино хем чисто бакхро, ²⁰Кој сине англедер одредимо, англедер о создавање е светоскоро, а јавинѓапе ко последна времиа баши туменге, ²¹кој преку Лесте поверујнген ко Девел, Кој ваздинѓале таро муле хем денѓале слава, аѓар со тумари вера хем тумари надеж те овен ко Девел.

Е Девлескоро Лафи

²²Откога преку o Духо очистинѓeн тумаре душе преку послушност ко чачипа баши искрено пхраликано мангипа, манген тумен јек јекеја искрено са таро срце, хем чисто срцеја, ²³соске сијен неве бијанде, на таро семе кова со мерела, него таро џивдо хем вечно Девлескоро лафи кова со на мерела. ²⁴Соске:

А адавај тано о лафи, ковај туменге тано објавимо сар Евангелие.