О Џивдо Бар хем о биримо народо

¹Хем аѓар, чхивен ки страна секова билачхипа хем секова ховајбе, дујмујалипа, завист, хем билачхе лафи некаскоро те ќерен. ²Сар неве бијанде чхаве, дикхен те овен жедна пало чисто духовно тхуд е Девлеске ко Слово, за да те бајрон преку лесте баши о спасение, ³ако укусинген дека о Девели тано шукар.

⁴Авен ко Исус, Ови тано о џивдо Бар, Кас со чаче о мануша фрдингеле, ама Ови тано Кој тано биримо таро Девел, хем скапоцено. ⁵Хем коркори туменда, сар џивде бара, градинена тумен ко духовно кхер, за да те овен свето свештенство, за да те ден духовна жртве, колај тане угодна е Девлеске, преку о Исус Христос. ⁶Соске пишинела ко Свето Писмо:

⁷Аѓар, баши туменге, кој со верујнена, Ови тано скапоцено; а баши окола кола со на верујнена,

⁸хем:

ки која сопниненапе окола, со на шунена хем на верујнена е Девлескоро Слово, баши соске тане хем определиме.

⁹А тумен сијен избиримо родо, царско свештенство, свето народо, народо со припадинела е Девлеске, за да те ваќерен те ширинен о славна дејља Околескере, Кој викинѓа тумен таро каранлуко ки Пли чудесно светлина, ¹⁰тумен кола некогаш на сијен сине народо, акана сијен Девлескоро народо; туменге кола некогаш на сине милост, акана иси тумен добинген е Девлескири милост.

¹¹Мангљален, молинава тумен: сар привремена житејља хем јабанџие ки акаја пхув сијен, те иќерен тумен таро е телоскере желбе, соске ола маренапе против и душа. ¹²Понашинен тумен шукар машкар о народо, аѓар со, баш ко одова баши со ќерена тумен крива, хем нападинена тумен сар мануша со ќерена билачхипа, упри одова кога ка дикхен тумаре шукар дејља, те прославинен е Девле ко диве е посетакоро.

Те ова покорна баши о властиа

¹³Због о Господари покоринен тумен баши секоја манушикани власт: било царoске, сар врховно владетели, ¹⁴било е управителенге, сар олескере пратениќа сој чхивде, баши те казниненлен околен билачхипе со ќерена, а те пофалиненлен околен шукарипа со ќерена. ¹⁵Соске акавај тано е Девлескири војља, ќерибаја шукар те пханден о муја ленгере хем о биџандипа е бигоѓакере манушенгере. ¹⁶Иако сијен слободна, ама ма употребинен и слобода, сар покрив е билачхипаске, него сар Девлескере слуге. ¹⁷Поштојнен саринен, манген о пхралипа, даран таро Девел, поштојненле е царо.

¹⁸Тумен о слуге, покоринен тумен ленге тумаре господаренге целосно дараја, хем на само е шукаренге хем е кротконге, него хем околенге, сој нае тане праведна. ¹⁹Соске одовај тано вредно е Девлеске ко јајкха, кога некој цидела неправедливо хем поднесинела муке, ха-три е Девлескоро. ²⁰Зарем би овела сине фалибаске, ако трпинена казна со заслужинена? Ама ако ќерена шукар, а сепак палем цидена, одовај тано вредно е Девлеске ко јајкха.

О Христос мукља пример

²¹Соске баши одова сијен викиме, соске хем о Христос цидинѓа баши туменге, хем мукља туменге пример, за да те џан пало олескере чекојра:

²³Ов Кој сине навредимо, на иранела сине навредаја; кога цидела сине на заканинелапе сине, него предајнѓапе Пес Околеске, Кој судинела праведно. ²⁴Ов коркори ко Пло тело легарѓа амаре гревиа ко крсто ко каш, та амен, те ова муле баши о гревиа, те живина баши правда; преку Олескере ране састилен тумен.

²⁵Соске пхирена сине сар нашавде бакхре, ама акана иранген тумен ко Пастири хем о Чувари таро тумаре душе.