1 Петрово 5

Со ваљани те ќерен о старешине

¹Е старешинен машкар туменде сој тане викинавален ме, кој сијум меда коркори старешина хем сведоко баши е Христоскоро цидиба хем учеснико ки слава, која ка откринелпе; ²грижинен тумен шукар баши е Девлескоро стадо ковај тано машкар туменде, хем пазиненле, на силаја, него војљаја, сар со о Девел мангела; на тари желба баши тумаро корист ховајбаја те зарадинен, него са срцеја те ќерен одова, ³хем на сар те господаринен упро околенде, колај туменге довериме, него овен пример е стадоске. ⁴Хем кога ка појавинелпе о Најбаро Пастири, ка приминен и круна e славакири која на шуќола.

Фрден тумаре гриже ки Лесте

⁵Аѓар хем тумен о потерне покоринен тумен е старешиненге. А сарине јек јекеске овен понизна хем шукарипаја, соске:

⁶Хем аѓар понизинен тумен тело е Девлескоро силно вас, за да те ваздел тумен ко право време. ⁷Хем секоја тумари секирација фрденла ки Лесте, соске Ов грижинелапе баши туменге.

⁸Овен трезвена хем пажлива; тумаро противнико, о бенг, обиколинела сар лави со викинела, родела некас те глтинел. ⁹Овен против лесте, цврста ки вера, џандипаја дека тумареда пхрајља ко свето накхена исто цидибаја.

Благословиа хем поздравиа

¹⁰А о Девел е секоле благодатескоро, Кој викинѓа тумен ко Христос о Исус баши Пли вечно слава, пало тумаро кратко цидиба, Коркори ка усовршинел тумен, зорале ка ќерел тумен, ка дел тумен сила хем ка ќерел тумен цврсто темелиме. ¹¹Олеске слава хем власт ко вејќа е веконгоро. Амин!

¹²Преку е Силванеја, о верно пхрал, саво со рачунинавале, пишинѓум туменге акава накратко, за да те опоменинав тумен хем те сведочинав дека акавај тано чачикане Девлескири благодат, колате терѓона. ¹³Поздравинела тумен и црква и избирими туменцар ко Вавилон хем мо чхаво о Марко. ¹⁴Поздравинен тумен јек јекеја чумибаја таро мангипа. Мир сариненге туменге, кола со сијен ко Христос. Амин!