1 Петрово 4

Те живина баши е Девлескири слава

¹Хем аѓар, соске о Христос цидинѓа ко тело баши аменге, хем туменда те овел тумен асавки исто мисла, овен спремна, наоружиме, соске кој цидинѓа ко тело, ов чхинаѓа те џал пало грево, ²та со ачхило о време таро тумаро живото ко тело, те на накхенле спрема о манушикане страстиа, него спрема е Девлескири војља. ³Соске доста тано со ко англутно време ќерена сине сар со живинена о народо со на џанена е Девле, одолеја со живинена ко мелале румиме буќа, ко страстиа, ко пиба, ко лаџутне веселбе, ко матиба хем ко гадно идолопоклонство со пхагела е Девлескоро закони.

⁴Адалеске акана хем чудиненапес дека тумен на прастана оленцар ко иста пајна коте со иси о мелале хем румиме буќа, хем ваќерена против туменде; ⁵ола ка ден сметка Околеске, Кој тано спремно те судинел е џивденге хем е муленге. ⁶Уствари одолеске тано проповедимо о Евангелие хем околенгеда сој тане акана муле, за да те овен судиме сар мануша ко тело, а ко духо акана те живинен спрема о Девел.

⁷А о крајо баши о сај тано паше. Хем аѓар, овен гоѓавера хем џангавде ко молитве. ⁸Англедер о са нека овел тумен увек мангипа машкар туменде, соске ‘о мангипа учхарела бут гревиа.’ ⁹Овен гостољублива јек јавереске, бизо те овел туменге пхаро те ќерен одова.

¹⁰Соске секој тумендар добинѓа дари, служинен тумен олеја јек јекеја, сар шукар домакијна тари е Девлескири благодат со иси тумен таро бут разна врсте. ¹¹Ако некој ќерела лафи, нека ќерел сар Девлескере лафиа; ако некој служинела, нека служинел спрема и сила, која о Девел делала, за да те славинелпе ко са о Девел преку Исус Христос, Каске припадинела и слава хем и сила ко са о веќа. Амин.

Цидена е Христоске

¹²Мре мангљален, ма чудинен тумен со аракхљаѓовена ко е јагакоро испитување, со иклило машкар туменде, за да те искушинел тумен, сар нешто чудно те пхене овела туменге, ¹³него радујнен тумен дека учествинена е Христоске ко цидиба, за да те шај те радујнен тумен хем те веселинен тумен кога ка откринелпе Лескири слава.

¹⁴Блажена сијен ако префрлинена туменге баши е Христоскоро анав, соске тогаш о Духо е славакоро хем е Девлескоро бешела упра туменде. Чаче, спрема оленде, Ови тано хулимо, ама спрема туменде, Ови тано прославимо. ¹⁵Уствари никој тумендар ма те цидел сар убица, или чор, или билачхипе со ќерела или сар окова кој мешинелапе ко туѓа буќа, ¹⁶ама ако цидела сар е Исусескоро следбенико, те на лаџал, него те славинел е Девле адале анавеја, ¹⁷соске тано време те почминел о судо таро е Девлескоро кхер; а ако почминела прво амендар, сар би овела ленгоро крајо околенгоро, кола со на покориненапе е Девлеске ко Евангелие? ¹⁸Хем:

¹⁹Одолеске хем окола, кола цидена е Девлескере војљаја, те предајнен пе душе е верно Создателеске, ќерибаја шукар.