2 Јованово

Поздрав

¹Таро старешина, џи ки избирими госпоѓа хем олакере чхаве, кој мангавален ко чачипе, хем на само ме, него хем сарине, кој пенџарге о чачипе, ²баши о чачипе, со ачхола ки аменде хем со ка овел аменцар довек. ³И благодат, о милост хем о мир ка овен аменцар таро Девел о Дат хем таро Господари о Исус Христос, о Чхаво е Дадескоро, ко чачипе хем мангипе.

О заповед е мангипаскоро

⁴Бут радујнѓум ман соске машкар те чхаве аракљум асавке, кој џана ко чачипе, сар со примингем заповед таро Дат. ⁵Хем акана молинава тут госпоѓо, на сар те пишинава туке неви заповед, него окоја со иси амен таро почеток: те манга амен јек јавереја. ⁶А мангипе тано акава: те џа според Олескере заповедиа. Одојај тани и заповед, сар со шунген таро почеток, ки која требела те џан.

Пазинен тумен

⁷Соске бут измамниќа иклиле ко свето, кој на исповединена дека о Исус Христос ало ко тело, одовај тано измамнико хем антихрист. ⁸Пазинен тумен те на нашавен окова со спечалингемле, него те приминен цело награда. ⁹Секој, кој џала надарик хем на ачхола е Христоске ки наука, наеле е Девле. Кој ачхола е Христоске ки наука, оле исиле хем е Даде хем е Чхаве.

¹⁰Ако некој ало ки туменде хем на анела акаја наука, ма приминенле ко кхер хем ма поздравиненле; ¹¹соске кој поздравинелале, учествинела ко олескере билачхе дејља.

Поздравиа

¹²Иси ман бут те пишинав туменге, ама на мангава лилеја хем мастило, него надинава ман дека ка авав туменге хем усно те ќерав лафи туменцар, за да те овел амари радост пхерди. ¹³Поздравинена тут о чхаве тари ти избирими пхен. Амин!