3 Јованово

Поздрав

¹О старешина џи ко мангло Гај, кас со мангавале ко чачипе. ²Мо мангло, мангава туке те овел туке шукар ко са хем те ове састо, сар со хем тано шукар тле душаке.

Пофалба баши сајгија

³Уствари, бут радујнѓум ман кога але о пхрајља хем посведочинге баши тло чачипе, сар ту џаја ко чачипе. ⁴Баши манге нае побари радост таро одова: те шунав дека ме чхаве џана ко чачипе.

⁵Мо мангло, постапинеја верно ко са со ќереја баши о пхрајља, хем одова баши о јабанџие, ⁶кој англи црква посведочинге тло мангипе: ка ќере шукар, ако испратинејален пало начин, сар сој тано достојно англо Девел, ⁷соске путујнена баши Олескоро анав, на приминге ништо таро народиа. ⁸Хем аѓар, амен сијем дужна те примина асавкен, за да те ова соработниќа баши о чачипа.

О билачхипа таро Диотреф хем о шукарипа таро Димитрија

⁹Хем пишинѓум нешто е цркваке, ама о Диотреф, кој мангела те овел прво машкар оленде, на приминела амен амен. ¹⁰Одолеске ако авава одори, ка потсетинав баши олескере дејља, со ќерелален, нападинѓа амен билачхе лафенцар, хем на задоволинелапе одолеја, него коркори на приминела е пхрален, а околенге кој мангена те приминенлен, забранинела ленге хем гонинелален тари црква.

¹¹Мо мангло, ма угледин тут ко билачхипе, него ко шукарипе. Кој ќерела шукар таро Девели тано; кој ќерела билачхипа, на дикхља е Девле.

¹²Баши о Димитрија синеле сведоштво таро сарине – хем таро коркоро чачипе. А хем амен сведочинаја; а џанеја дека амаро сведоштво тано чачикано.

Крајна поздравиа

¹³Сине ман те пишинав туке бут, ама на мангава те пишинав туке мастилоја хем перо, ¹⁴а надинава ман дека ка дикхав тут скоро, хем ка ќера лафи усно. ¹⁵Мир туја! Поздравинена тут о пријатејља! Поздравин е пријателен ко анав!