Поздрав џи ки црква ко Ефесјајна

¹О Павле, преку е Девлескири војља апостоли е Исусе Христоскоро, џи ко света хем верна ко Христос Исус ко Ефес: ²и благодат ки туменде хем мир таро Девел, амаро Дат хем таро Господари о Исус Христос!

Благословиме ко Христос

³Те овел благословимо о Девел хем о Дат амаре Господарескоро о Исус Христос, Кој благословинѓа амен, ко Христос, секоле духовно благословеjа, ко небесна тхана; ⁴соске избиринѓа амен ки Лесте, англедер те создајнелпе о свето, за да те ова света хем бизо флека англо Лесте ко мангипе. ⁵Ов англедер одлучинѓа те посвоинел амен те ќерел амен Пе чхаве преку о Исус Христос, спрема Пли гудли намера тари Пли војља, ⁶за да те овел фалими и слава тари Олескири благодат, која дарујнѓа амен ко Пло Мангло Чхаво.

⁷Ко Исус иси амен слобода, колеја платинѓа амен хем кинѓа амен преку Пло рат, прошка амаре гревонге, спрема о барвалипа тари Лескири благодат ⁸која чхорѓала изобилно аменге секоле мудростеја хем хајљојбаја. ⁹Ов сикаѓа аменге амен те џана и тајна тари Пли војља, спрема Пли гудли намера, со одлучинѓала ки Лесте, ¹⁰за да те ќерела кога ка пхерѓон о времиа; за да те кхедел ко јек ко Христос: са сој тано ки небеса хем сој тано ки пхув.

¹¹Ки Лесте хем аменда сијем сине избириме баши наследниќа, соске сијем сине определиме англедер е одлукаја Околескири, Кој ќерела са сар Ов ка решинел спрема Пли војља, ¹²за да те ова баши пофалба баши Лескири слава, амен, кој веќе англедер надингем амен ко Христос.

¹³Ки Лесте хем тумен, откога шунген о слово е чачипаскоро – о Евангелие баши тумаро спасение – хем откога тумен поверујнген, улен запечатиме е Свети Духоја ковај тано ветујмо, ¹⁴Кој тано гаранција баши амаро наследство, баши о платиба хем о киниба околен кој уле Девлескоро сопственост – за пофалба баши Олескири слава.

Са чхиѓа тело Олескере пре

¹⁵Одолеске хем меда, сар шунѓум баши тумари вера ко Господари ко Исус хем баши тумаро мангипе ко са о света, ¹⁶на ачховава те спомнинав тумен ко мле молитве хем те заблагодаринав баши туменге, ¹⁷та о Девел амаре Господарескоро о Исус Христос, о Дат е славакоро, те дел тумен духо таро мудрост хем откровение ко чачикано пенџариба Оле: ¹⁸хем те избистринел о јајкха таро тумаро срце, за да те џанен ко Лескоро викиба сави нада иси амен, хем кобори о барвалипе таро Лескоро славно наследство ко светие, ¹⁹хем кобор тани пребари Лескири сила спрема аменде кој верујнаја - спрема и бути со делујнела тари Лескири моќно сила ²⁰со сикаѓала ко Христос, кога ваздинѓале таро муле хем чхиѓале десно Пестар ко небесна тхана, ²¹дур упредер секова началство, хем власт, хем сила, хем господарство хем упредер о секова анав, кова спомнинелапес на само ко акава свето, него хем ко окова со авела.

²²Хем са чхиѓа тело Олескере пре, а Оле баши Шеро чхиѓале упредер о са ки црква, ²³која тани Олескоро Тело – и полнота Околескири, кој пхерела са ко са.