Пали благодат сијен спасиме

¹Хем туменда, кој сијен сине муле баши тумаре престапиа хем гревиа, ²ко кова живинена сине некогаш сар о јавера народо сар со живинена ко свето, спрема о владетели е воздушно силенгоро – о духо, кој ќерела бути акана машкар о чхаве со на мангена те шунен е Девле. ³Машкар акала, хем аменда живингем некогаш кo амаре страстиа е телоскере, ќераја сине о буќа со мангела амаро тело хем о мисле хем сијем сине ки природа чхаве е хољакере сар хем о са јавера.

⁴Ама о Девел, Кој тано барвало милостеја, таро Пло баро мангипе колеја замангља амен, ⁵џивде ќерѓа амен заедно е Христоја хем амен, кој сијем сине муле баши амаре гревиа – пали благодат сијен спасиме! – ⁶хем Олеја воскреснинѓа амен хем Олеја бешаќерѓа амен ко небесна тхана, ко Христос Исус, ⁷та ко идна веќа те сикавел о пребаро барвалипе тари Пли благодат, спрема Пло шукарипа ки аменде ко Христос Исус.

⁸Соске пали благодат сијен спасиме, преку вера, хем одова нае тано тумендар коркори – одовај тано е Девлестар поклон! ⁹Нае таро дејља, за да те на фалинелпе некој. ¹⁰Соске, Лескоро дело сијем, создајме ко Христос Исус, баши шукар дејља, кола о Девел спреминѓален англедер, за да те живина ки ленде.

Ови тано амаро мир

¹¹Одолеске ма бистрен со сијен сине поангле. Тумен спрема о бијаниба на сијен Евреа. А окола сој тане обрезиме, иако тано одова само телесно обрезиба хем ќердо таро манушикано вас, бут теле дикхена сине тумен хем ваќерена тумен „ o биобрезиме“. ¹²Одова сине кога на сине тумен о Христос. Сијен сине јабанџие, хем на сијен сине дело таро е Девлескоро народо. На сине тумен дело ко завет, ко ветување со о Девел денѓален Пе народоске. Живинена сине ко акава свето бизо надеж хем бизо Девел. ¹³А акана ко Христос Исус, тумен кој некогаш сијен сине дур, улен паше преку е Христоскоро рат.

¹⁴О Христос тано Одова со смиринѓа амен, Кој таро Евреа хем со нае Евреа ќерѓа јек народо. Пејљарѓале о ѕидо со делинела амен сине хем ќерела амен сине душмајна. ¹⁵Пле мерибаја о Христос чхиѓа крајо баши о цело еврејско системи таро заповедиа хем правила. Преку Песте о Христос ќерела нево мануш, хем таро Евреи хем таро со нае Евреи, хем аѓар ќерела мир. ¹⁶Мерибаја ко крсто, хем баши о Евреа хем баши окола со нае Евреа, о Христос уништинѓа о душманлуко со владинела сине машкар ленде, смиринѓален е Девлеја, кхединѓален ко јек народо.

¹⁷Ов ало те проповединел мир туменге, кој сијен сине дур хем мир околенге, кој сине паше: ¹⁸соске преку Лесте, хем акала хем о јавера, иси амен пристап ко Дат ко јек Духо.

О Христос амаро аголно бар

¹⁹Одолеске, тумен на сијен веќе јабанџие хем странциа, него сијен е светиенцар е Девлескоро народо хем о кхерутне е Девлескере, ²⁰градиме упро темели е апостоленгоро хем е пророконгоро, а о аголно бар тано коркори о Христос Исус. ²¹Упри Лесте цело состајми градба бајрола ко свето храми ко Господари, ²²упри Касте хем туменда ко Духо заедно градинена тумен ко е Девлескоро бешиба.