Сар ваљани те овен и дај о дат хем о чхаве

¹Чхавален, шунен тумаре даја хем даде због баши о Господари, соске одовај тано право. ²‘Поштојн те даде хем те даја’ – одовај тани и прво заповед е ветувајнеја- ³‘за да те овел туке шукар хем за да те живине подугачко време ки пхув.’

⁴А тумен, дадален, ма хољанќерен тумаре чхавен, него воспитиненлен сикајбаја хем опоменибаја таро Господари.

Сар ваљани те овен о робиа хем о господајра

⁵О тумен со сијен робиа, шунен тумаре господарен ки пхув сој тане, ки дар хем ко трепет, искрена таро са о срце сар е Христоске! ⁶Ма служинен само шукар англо јајкха ленгере, сар окола кој дикхена те угодинен е манушенге, него сар е Христоскере служитејља, кој са тари душа извршинена е Девлескири војља! ⁷Служинен ленге шукар војљаја сар е Господареске, а на е манушенге, ⁸џандипаја дека секова робо или слободно мануш, ако ќерела нешто шукар, ка добинел одова таро Господари!

⁹А тумен, господајра, понашинен тумен исто аѓар оленцар, бизо те претиненлен, џандипаја дека оленгоро хем тумаро Господари тано ки небеса! Хем дека Ов на дикхела кој тано кој!

Уравен тумен ко са е Девлескоро оружје хем опрема

¹⁰Најпосле, појачинен тумен ко Господари хем ки сила тари Лескири моќ! ¹¹Уравен тумен ко са е Девлескоро оружје хем опрема, за да те шај те спротивинен тумен ко ховавне билачхе буќа е бенгескере. ¹²Соске амари борба нае тани против о рат хем о тело, него против о началствиа, против о властиа, против о светска владетејља е каранлукоскере ко акава веко: против о духовна силе е билачхипаскере ко небесна тхана.

¹³Одолеске лен цело е Девлескоро оружје хем опрема, за да те шај те бранинен тумен ко билачхо диве, хем откога ка завршинен са, те терѓовен цврсто! ¹⁴Хем аѓар, терѓовен цврсто, пханле е чачипаја преку ки половина, хем уравде англал ко колин е оклопеја е правдакоро, ¹⁵а ко пре уравде спремна баши о Евангелие е мирескоро! ¹⁶Ко са акалеја, лен о штити е веракоро, колеја ка шај те ачхавен са о јагале стрелке е билачхескере. ¹⁷Ленле хем о шлеми е спасениескоро хем о мачи е Духоскоро – кој тано е Девлескоро слово, ¹⁸секоле родибаја хем молитваја, молинен тумен ко Духо ко секова време, хем баши одова овен џангавде, ден са тумендар, издржинен хем молитваја баши са о светие. ¹⁹Хем баши манге, те делпес манге слово кога ка пхравав мо муј, за да те шај те ваќерав бизо дар и тајна таро Евангелие, ²⁰баши кова сијум пратенико ко пханлипа: за да те ќерав лафи бизо дар, сар со хем требела те ваќерав.

Благословиа хем поздравиа

²¹А за да те џанен хем туменда са баши манге со ќерава бути хем сар сијум, баши о са ка ваќерел туменге о Тихик, о мангло пхрал хем верно слуга ко Господари; ²²одова себепи бичхававале ки туменде, за да те џанен сар сијем амен хем за да те утешинел тумаре срциа.

²³Са е пхраленге одори мангава ленге мир хем мангипе вераја со авела таро Девел о Дат хем таро Господари о Исус Христос.

²⁴Хем нека овел и благодат сариненцар кој мангенале амаре Господаре е Исусе Христе мангипаја со на ачхола!