Живинен мангипаја

¹Хем аѓар, лен пример таро Девел хем одова ќерен, соске тумен сијен е Девлескере мангле чхаве, ²хем живинен мангипаја, сар со хем о Христос замангља амен хем предајнѓапе Пес баши аменге, сар денди жртва сој тано шужо хем угодно мирис е Девлеске.

³А о блудство хем секова гадна мелалипа, или окова со мангела те дикхел ко корист само песке, те на спомнинелпес машкар туменде, сар со бешела е света манушенге. ⁴Ниту безобразна хем чуче лафиа, ниту смешке, сој нае тане шукар ваќерибаске, него пошукар те благодарина е Девлеске. ⁵Соске, џанен акава шукар: нијек блуднико, нијек мелале буќа со ќерела, нијек окова со мангела те дикхел ко корист само песке – кој тано идолопоклонико – наелен наследство е Христоске хем е Девлеске ко Царство!

⁶Никој те на ховавел тумен чуче лафенцар, соске баши асавке букенге авела е Девлескири холи упро окола чхаве со на шунена е Девле. ⁷Хем аѓар, ма чхивен тумен асавкенцар асавке мелале буќа те ќерен!

Чхаве е светлинакере

⁸Соске некогаш сијен сине каранлуко, ама акана сијен светлина ко Господари: живинен сар чхаве е светлинакере. ⁹А о Духо дела плоди со иќерелапе ко секова шукарипа, ко праведност, хем ко чачипа!

¹⁰Испитинен сој тано угодно е Господареске, ¹¹хем ма чхивен тумен те ќерен асавке бизоплодна дејља сој тане е каранлукоскере, него пошукар: откриненлен! ¹²Соске тано лаџаво те ќерелпе лафи хем баши одова со ола ќеренале гаравутно. ¹³Ама и светлина ка откринелен хем са ка икљол ки виделина, соске са сој тано икавдо ки светлина, дикхјолапе. ¹⁴Одолеске ваќерелапе:

¹⁵Хем аѓар пазинен шукар, сар живинена! На сар бигоѓакере, него сар мудра. ¹⁶Искористиненле о време, соске о диве тане билачхе. ¹⁷Одолеске ма овен бигоѓакере, него хајљовен сој тани е Девлескири војља! ¹⁸Хем ма маќовен мољаја, ко ковај тане о румиме буќа, него пхерен тумен е Духоја!

¹⁹Ќерен лафи машкар туменде јек јекеја псалменцар, химненцар, хем духовна гиленцар! Гиљавен е Господареске, хем гиљавенле ко тумаре срциа! ²⁰Благодаринен Леске секогаш баши о са е Девлеске е Дадеске, ко анав амаре Господареске е Исусе Христоске! ²¹Покоринен тумен јек јекеске ки дар таро Христос!

Сар ваљани те овен о рома хем о ромња

²²О ромња те покориненпес пе роменге, сар е Господареске, ²³соске о ром тано шеро е ромнакоро, сар сој тано хем о Христос Шеро е Црквакоро хем Ов тано Спасители е Телоскоро! ²⁴Хем сар со и Црква покоринелапес е Христоске, аѓар те овен хем о ромња ко са покорна пумаре роменге.

²⁵Ромален, манген тумаре ромнен, сар со хем о Христос замангља и Црква хем предајнѓапе Коркори Пес баши лаке, ²⁶за да те осветинела, очистинѓала пајнеја тхоѓала ко слово, ²⁷хем те претставинела англо Песте и славно Црква, кола наела махана, ниту брчка, или нешто слично, за да те овел свето хем бизо флека.

²⁸Аѓар хем о рома тане должна те манген пле ромнен сар пумаре тејља. Кој мангела пле ромња, мангелапе пес. ²⁹Соске никој никогаш на замрзинѓа пло тело. Него, паравелале хем таќарелале сар хем о Христос е Црква. ³⁰Соске, амен сијем члениа Олескере Телостар – таро Олескоро мас хем Олескере кокала.

³¹‘Одолеске о мануш ка мукел пе даде хем пе даја хем ка прилепинелпе ки пли ромни, хем о солдуј ка овен јек тело.’ ³²Акаја тајна тани бари – а ме ваќерава дикхибаја ко Христос хем ки Црква. ³³Хем аѓар, секој тумендар те мангел пе ромња сар пес, а и ромни те поштојнел пле роме.