Галатјајна 2

О Евангелие доверимо е Павлеске баши о необрезиме

¹Ко дешуштар берш пало одова гељум упре палем ко Ерусалим е Варнаваја, лељум манцар е Тите, ²а гељум упре пало откровение хем објаснинѓум о Евангелие, кова проповединава машкар о народо, ама на само е угледна водаченге, шајда те на прастава или те на прастандиљум ко чучо. ³Ама ни о Тит, кој сине манцар, иако Грко, на сине принудимо те обрезинелпе, ⁴хем одова баши тајно анде ховавне пхрајља, кола чхигепе за да те дикхен амари слобода која иси амен ко Христос Исус, за да те поробинен амен. ⁵Каске на муклем ни јек часи, ниту покорингем амен ленге, за да те ачхол туменцар о чачипе таро Евангелие.

⁶А со однесинелапе баши окола, кола сине рачуниме сар угледна водачиа, саве те сине некогаш, манге тано са јек - о Девел на дикхела е манушеске ко муј - ола о угледна водачиа ништо на додајнге манге. ⁷Него, напротив, кога дикхле дека манге тано доверимо о Евангелие машкар о необрезиме, сар е Петареске машкар о обрезиме, ⁸соске Окова, Кој ќерела бути е Петреја баши апостолство машкар о обрезиме, ќерела бути манцарда баши о паганска народо.

⁹Хем кога халиле и благодат, сој манге тани денди, о Јаков, о Кифа хем о Јован, кој сине рачуниме баши стубиа, денге амен, ман хем е Варнава, о деснице ко знако е заедништвоскоро; за да те џа амен џи ко паганска народо, а ола џи ко обрезиме; ¹⁰само те спомнина аменге баши о чороле, баши исто, со хем дава сине мандар са те ќеравле.

Оправдиме преку и вера ко Исус Христос

¹¹А кога о Кифа ало ки Антиохија, спротивсалиљум леске англо муј, соске требела сине те овел осудимо. ¹²Уствари, пред те авен некој таро Јаков, ов хала сине е нееврејско народоја, но кога але акала, ов повлечинѓапе хем отстранинѓапе тари дар таро обрезиме. ¹³Хем ќеренајне дујмуја олеја хем о јавера Јудејциа, аѓар со оленгоро дујмујалипа цидинге хем е Варнава.

¹⁴Кога дикхљум дека на џана право според о чачипа таро Евангелие, ваќерѓум е Кифаске англо сарине: „Ако ту, кој сијан Јудејцо, живинеја сар о народо; а на јудејско, сар шај те принудине е народон те живинен јудејско?

¹⁵Амен сијем бијаме Јудејциа, а на грешниќа таро народиа. ¹⁶Ама пошто џанаја дека о мануш на оправдинелапес таро дејља е Законескере, него само преку и вера ко Исус Христос, хем амен поверујнгем ко Христос Исус, за да те оправдина амен тари вера ко Христос, а на таро дејља е Законескере; соске таро дејља е Законескере нае те оправдинелпе ниту јек мануш.

¹⁷Па ако хем амен коркори, мангипаја те оправдина амен ко Христос, араклисалилем грешниќа, дали тано тогаш о Христос служители е гревоскоро? Дур таро одова! ¹⁸Соске ако палем ѕидинава окова со рушинѓумле, сикавава ман сар престапнико, ¹⁹соске ме муљум преку о Закони баши о Закони, за да те живинав баши о Девел. ²⁰Е Христоја сијум распнимо ко крсто; хем ме веќе на живинава, него о Христос живинела ки манде; а о живото со акана живинава ко тело, живинава преку вера е Девлеске ко Чхаво, Кој замангља ман хем предајнѓапе Пес баши манге. ²¹На поништинава е Девлескири благодат, соске ако и правда авела преку о Закони, тогаш о Христос муло напразно.“