О чхаве е веракере

¹О бигоѓакере Галатјајна! Кој магепсинѓа тумен, англо каскере јајкха о Исус Христос тано јасно цртимо сар распнимо? ²Мангава само акава те сикљовав тумендар: дали приминген о Духо упри основа е делонгири е Законескири или преку шуниба вераја?

³Добором ли сијен бигоѓакере? Со почминѓа е Духоја, акана коркори завршинена е телоја? ⁴Дали добором бут цидинген ко чучо? Акој тано чаче ко чучо! ⁵А Окова, Кој дела тумен Духо хем ќерела силна дејља ки туменде, дали ќерела одова упри основа е делонгири е Законескири или преку шуниба вераја?

⁶Сар со хем о Авраам ‘поверујнѓа ко Девел хем одова рачунисалило леске баши праведност.’ ⁷Хем аѓар, признајнен дека е Авраамескере чхаве тане окола, кола тане тари вера. ⁸А хем о Свето Писмо предвидинѓа, дека о Девел преку и вера оправдинела е народон, хем англедер навестинѓа о Евангелие е Авраамеске: ‘Ки туте ка овен благословиме са о народиа.’ ⁹Хем аѓар, окола, кој верујнена тане благословиме заедно е верно Авраамеја.

О Христос кинѓа амен

¹⁰Уствари кој ќерена о дејља е Законескере, тели клетва тане, соске тано пишимо: ‘Проклето те овел секој, кој нае тано постојано ко са сој тано пишимо ко Лил е Законескоро, те исполнинел одова.’ ¹¹А дека никој нае тано оправдимо англо Девел преку о Закони, јасно тано, соске ‘о праведнико ка живинел тари вера.’ ¹²А о Закони нае тано тари вера, него пхенела: ‘Кој исполнинелален, ка живинел преку оленде.’

¹³О Христос кинѓа амен таро проклетство е Законескоро, откога уло проклетство баши аменге, соске тано пишимо: ‘Проклето те овел секој, кој висинела ко каш!’ ¹⁴Та е Авраамескоро благослов те авел е народонге ко Христос о Исус, хем те приминале преку и вера о ветување е Духоскоро.

О Закони сине амаро воспитувачи

¹⁵Пхрајљален, ќерава лафи манушикане: о завет со мануш потврдинѓале, никој на отфрлинелале, ниту додајнела леске нешто. ¹⁶А о ветувања сине ленге денде е Авраамеске хем олескере потомствоске. О Свето Писмо на ваќерела баши потомствиа, сар буте џененге; него сар јекеске: ‘хем баши тло Потомство,’ Кој тано о Христос.

¹⁷Ваќерава хем акавада: о Закони со уло пало штаршелу хем тријанда берш, на поништинела о завет, кова о Девел потврдинѓале англедер, ниту поништинела о ветување. ¹⁸Соске, ако о наследство авела таро Закони, одова веќе нае тано таро ветување; ама о Девел подаринѓа е Авраамеске преку ветување.

¹⁹Тогаш, соске тано о Закони? Ови тано определимо ко посредство е ангеленцар, вастеја таро јек посреднико, па тано додајмо баши о престапиа, џи коте на авела о Потомок, Каске тано дендој о ветување. ²⁰Посреднико пак нае атхе, коте сој тано само јек; а о Девели тано јек.

²¹Според одова, дали тано о Закони против баши е Девлескере ветувања? Дур таро одова! Соске, ако сине дендо Закони, со шај те дел живот, тогаш чаче о праведност би овела таро Закони, ²²ама о Свето Писмо саринен пханљален тело грево, хем упри основа и вера ко Исус Христос о ветување те овел дендо околенге, кој верујнена.

²³А пред те авел и вера, сијем сине тели стража е Законескири, пханле, џи ко време е веракоро која требела сине те откринелпе. ²⁴Аѓар, о Закони сине амаро воспитувачи џи ко Христос, за да те оправдина амен преку вера. ²⁵А акана али и вера, хем на сијем повише тело воспитувачи.

Чхаве Девлескере преку вера ко Христос

²⁶Соске, сарине сијен Девлескере чхаве преку вера ко Христос Исус, ²⁷соске сарине, кола крстинген тумен ко Христос, ураген тумен ко Христос. ²⁸Нае веќе ни Јудејцо ни Грко, нае веќе ни робо ни слободно, нае веќе ни мурш ни џувли, соске саре тумен сијен јек ко Христос Исус. ²⁹Ако сијен пак тумен е Христоскере, тогаш сијен е Авраамескоро семе, наследниќа пало ветување.