Колосјајна 2

Кобор борба иси ман баши туменге

¹Уствари, мангава те џанен кобор борба иси ман баши туменге, хем баши окола ки Лаодикија, хем баши са кој со на дикхле ман лично, ²за да те утешиненпес оленгере срциа хем соединиме ко мангипа те авен џи ко са о барвалипа ки пхерди увереност е хајљобаскоро џи ко пенџариба и тајна е Девлескири хем е Христоскири, ³ки Касте тане гаравде са о барвалипе тари мудрост хем е џандипаскоро.

⁴А акава ваќерава за да те на ховавел тумен некој убедиме лафенцар. ⁵Соске иако сијум отсутно ко тело, ко духо сијум туменцар, хем радујнавапес дикхибаја тумаро редо хем цврстина тумаре веракири ко Христос.

Кој тано Шеро секоле началствоске хем власт

⁶Хем аѓар, сар со приминген е Христа Исусе о Господари, аѓар хем те џан ки Лесте: ⁷вкорениме хем надѕидиме ки Лесте хем зацврстиме ки вера, сар со сијен сикавде, те изобилинен ко благодарност.

⁸Пазинен те на заробинел тумен некој философијаја хем суетно ховајбаја пало манушикано обичај, според о живиба е светоскоро, а на според о Христа. ⁹Соске ки Лесте телесно живинела са и полнота е Девлипаскири, ¹⁰хем тумен сијен исполниме ки Лесте, Кој тано Шеро секоле началствоске хем власт.

¹¹Ки Лесте сијен хем обрезиме со нае вастеја обрезиме, хуљајбаја е гревоскоро тело, пало обрезание ко Христа; ¹²откога сијен сине паруме Олеја ко крштевање, колеја хем воскреснинген Олеја преку и вера ко делујба е Девлескоро, Кој воскреснинѓале таро муле.

¹³Тумен кој сијен сине муле ко гревиа хем биобрезиме ко тумаро тело, оживинѓа тумен заедно Олеја, опростибаја са амаре гревиа; ¹⁴ко одова начин со избришинѓа о делујба, кова со пле одредбенцар сине против аменге; отстранинѓа машкар амендар, ковинѓален ко крсто; ¹⁵хем разоружинѓа началствиа хем властиа хем јавно изложинѓален, победибаја упредер оленде ко одова.

¹⁶Хем аѓар, никој те на осудинел тумен баши хајба, или баши пиба, или дисаве празникоске, или баши терни месечина, или баши и сабота. ¹⁷Одовај тано само сенка околескири со ка авел, а о стварност тано о Христос. ¹⁸Никој те на отстранинел тумен тари награда, мангипаја те ресел одова со понизност хем службаја е ангеленгири, те мукелпес ко одова со дикхља, те вазделпе ко чучо пле телесно гоѓаја, ¹⁹а на иќерелапес баши о Шеро таро кова цело Тело, пханло хем поможимо е зглобенцар хем о врске, бајрола барипаја, кова дела о Девел.

²⁰Хем аѓар, ако мулен е Христоја, баши о елементарна буќа е светоскере, соске дозволинена те определиненпес туменге прописиа, сар те живинен ко свето: ²¹„Ма астар! Ма вкусин! Ма пипин!“ ²²Са акава со пропадинела е употребаја според манушикане заповедиа хем учење; ²³са акава дикхјола мудрост, со состојнелапес ки самоволно побожност хем понизност хем ки непоштедно строга ко тело, а на ко нешто чесно, него само баши задоволство е телоске.