Мислинен баши одова сој тано упре

¹Хем аѓар, ако воскреснинген е Христоја, роден одова сој тано упре – коте со о Христос бешела десно таро Девел. ²Мислинен баши одова сој тано упре, на баши одова сој тано ки пхув, ³соске тумен мулен хем тумаро живото тано гаравдо е Христоја ко Девел! ⁴А кога ка јавинелпес о Христос, амаро живото, тогаш хем тумен ка јавинен тумен Олеја ки слава.

⁵Хем аѓар, мејраќерен тумаре члејна сој тане ки пхув: о блудство, о мелалипа, и страст, и билачхе желба, хем о алчност, сој тано идолопоклонство, ⁶баши кола авела е Девлескири холи е непослушна чхавенге, ⁷машкар кој хем туменда некогаш гелен, кога живинена сине ки ленде. ⁸Ама акана отфрлиненле хем туменда са акава: о хољаниба, и холи, о билачхипа, хулење, лаџутне лафиа таро тумаро муј.

⁹Ма ховавен тумен јек јавереја, соске хуљаген о пурано мануш олескере делонцар ¹⁰хем ураген нево, кој обновинелапе ко пхердо пенџариба пало образ Околескоро, Кој создајнѓале, ¹¹коте нае веќе Грко ни Јудејцо, обрезание хем необрезание, варварин, Скит, робо, слободно, него о Христос тано са хем ко са.

¹²Хем аѓар, уравен тумен сар Девлескере избраниќа, света хем мангле, ко милосрдно срце, благост, смириме, кротка, трпелива! ¹³Трпинен тумен јек јавереја хем опростинен туменге јек јавереске, ако некој иси со ровелапе против некасте, сар со хем о Господари опростинѓа туменге, аѓар опростинен туменда! ¹⁴А упредер о са одова уравен тумен ко мангипе, која пхандела са ко совршенство! ¹⁵Хем е Христоскоро мир те владинел ко тумаре срциа, баши касте со хем повикујме сијен ко јек тело, хем овен благодарна!

¹⁶E Христоскоро слово те живинел изобилно ки туменде, ки секоја мудрост сикљовен хем опоменинен тумен јек јавере псалменцар, химне, духовна гиља, гиљајбаја е Господареске е благодатеја ко тумаре срциа. ¹⁷Хем са со ќерена лафеја или ко дело, ќерен са ко анав е Господареске е Исусеске, благодаринен е Девлеске о Дат, преку Олесте.

Сар ваљани те овен

¹⁸Ромнален, покоринен тумен тумаре роменге, сар со бешела ко Господари!

¹⁹Ромален, манген тумаре ромнен хем ма овен груба спрема ленде.

²⁰Чхавален, шунен тумаре родителен ко са, соске одовај тано угодно е Господареске!

²¹Дадален, ма задинен тумаре чхавен, за да те на разочариненлен.

Сар ваљани те овен о робиа

²²О тумен о робиа, шуненлен ко са тумаре пхувјакере господарен, на баши јајкхенге сар окола кој угодинена е манушенге, него чисто срцеја дараја таро Девел.

²³Со хем да те ќерен, ќеренле тари душа сар баши е Господареске, а на баши о мануша, ²⁴џандипаја дека таро Господари ка приминен и награда е наследствоскоро. Служинен е Господареске о Христос! ²⁵Соске, кој ќерела неправда, ка приминела обратно и неправда, хем на дикхелапе кој тано кој.