1 Petrovo 5
So valjani te kjeren o starešine
1E starešinen maškar tumende soj tane vikinavalen me, koj sijum meda korkori starešina hem svedoko baši e Hristoskoro cidiba hem učesniko ki slava, koja ka otkrinelpe; 2grižinen tumen šukar baši e Devleskoro stado kovaj tano maškar tumende, hem pazinenle, na silaja, nego vojljaja, sar so o Devel mangela; na tari želba baši tumaro korist hovajbaja te zaradinen, nego sa srceja te kjeren odova, 3hem na sar te gospodarinen upro okolende, kolaj tumenge doverime, nego oven primer e stadoske. 4Hem koga ka pojavinelpe o Najbaro Pastiri, ka priminen i kruna e slavakiri koja na šukjola.
Frden tumare griže ki Leste
5Agjar hem tumen o poterne pokorinen tumen e starešinenge. A sarine jek jekeske oven ponizna hem šukaripaja, soske:
‘o Develi talo protiv baši okola so kjerenape ko baro,
a baši o ponizna dela blagodat.’
6Hem agjar ponizinen tumen telo e Devleskoro silno vas, za da te vazdel tumen ko pravo vreme. 7Hem sekoja tumari sekiracija frdenla ki Leste, soske Ov grižinelape baši tumenge.
8Oven trezvena hem pažliva; tumaro protivniko, o beng, obikolinela sar lavi so vikinela, rodela nekas te gltinel. 9Oven protiv leste, cvrsta ki vera, džandipaja deka tumareda phrajlja ko sveto nakhena isto cidibaja.
Blagoslovia hem pozdravia
10A o Devel e sekole blagodateskoro, Koj vikingja tumen ko Hristos o Isus baši Pli večno slava, palo tumaro kratko cidiba, Korkori ka usovršinel tumen, zorale ka kjerel tumen, ka del tumen sila hem ka kjerel tumen cvrsto temelime. 11Oleske slava hem vlast ko vejkja e vekongoro. Amin!
12Preku e Silvaneja, o verno phral, savo so računinavale, pišingjum tumenge akava nakratko, za da te opomeninav tumen hem te svedočinav deka akavaj tano čačikane Devleskiri blagodat, kolate tergjona. 13Pozdravinela tumen i crkva i izbirimi tumencar ko Vavilon hem mo čhavo o Marko. 14Pozdravinen tumen jek jekeja čumibaja taro mangipa. Mir sarinenge tumenge, kola so sijen ko Hristos. Amin!