1 Petrovo 4

Te živina baši e Devleskiri slava

¹Hem agjar, soske o Hristos cidingja ko telo baši amenge, hem tumenda te ovel tumen asavki isto misla, oven spremna, naoružime, soske koj cidingja ko telo, ov čhinagja te džal palo grevo, ²ta so ačhilo o vreme taro tumaro životo ko telo, te na nakhenle sprema o manušikane strastia, nego sprema e Devleskiri vojlja. ³Soske dosta tano so ko anglutno vreme kjerena sine sar so živinena o narodo so na džanena e Devle, odoleja so živinena ko melale rumime bukja, ko strastia, ko piba, ko ladžutne veselbe, ko matiba hem ko gadno idolopoklonstvo so phagela e Devleskoro zakoni.

⁴Adaleske akana hem čudinenapes deka tumen na prastana olencar ko ista pajna kote so isi o melale hem rumime bukja, hem vakjerena protiv tumende; ⁵ola ka den smetka Okoleske, Koj tano spremno te sudinel e dživdenge hem e mulenge. ⁶Ustvari odoleske tano propovedimo o Evangelie hem okolengeda soj tane akana mule, za da te oven sudime sar manuša ko telo, a ko duho akana te živinen sprema o Devel.

⁷A o krajo baši o saj tano paše. Hem agjar, oven gogjavera hem džangavde ko molitve. ⁸Angleder o sa neka ovel tumen uvek mangipa maškar tumende, soske ‘o mangipa učharela but grevia.’ ⁹Oven gostoljubliva jek javereske, bizo te ovel tumenge pharo te kjeren odova.

¹⁰Soske sekoj tumendar dobingja dari, služinen tumen oleja jek jekeja, sar šukar domakijna tari e Devleskiri blagodat so isi tumen taro but razna vrste. ¹¹Ako nekoj kjerela lafi, neka kjerel sar Devleskere lafia; ako nekoj služinela, neka služinel sprema i sila, koja o Devel delala, za da te slavinelpe ko sa o Devel preku Isus Hristos, Kaske pripadinela i slava hem i sila ko sa o vekja. Amin.

Cidena e Hristoske

¹²Mre mangljalen, ma čudinen tumen so arakhljagjovena ko e jagakoro ispituvanje, so iklilo maškar tumende, za da te iskušinel tumen, sar nešto čudno te phene ovela tumenge, ¹³nego radujnen tumen deka učestvinena e Hristoske ko cidiba, za da te šaj te radujnen tumen hem te veselinen tumen koga ka otkrinelpe Leskiri slava.

¹⁴Blažena sijen ako prefrlinena tumenge baši e Hristoskoro anav, soske togaš o Duho e slavakoro hem e Devleskoro bešela upra tumende. Čače, sprema olende, Ovi tano hulimo, ama sprema tumende, Ovi tano proslavimo. ¹⁵Ustvari nikoj tumendar ma te cidel sar ubica, ili čor, ili bilačhipe so kjerela ili sar okova koj mešinelape ko tugja bukja, ¹⁶ama ako cidela sar e Isuseskoro sledbeniko, te na ladžal, nego te slavinel e Devle adale anaveja, ¹⁷soske tano vreme te počminel o sudo taro e Devleskoro kher; a ako počminela prvo amendar, sar bi ovela lengoro krajo okolengoro, kola so na pokorinenape e Devleske ko Evangelie? ¹⁸Hem:

¹⁹Odoleske hem okola, kola cidena e Devleskere vojljaja, te predajnen pe duše e verno Sozdateleske, kjeribaja šukar.