1 Solunjajna 2
E Pavleskiri služba hem o ponašaj
1Soske korkori džanena, phrajljalen, deka amaro ajbe ki tumende na sine ko čučo. 2Naprotiv, iako poangle stradingem hem sijem sine hulime ko Filipi, sar so vekje džanena, sijem sine smela ko amaro Devel, te propovedina tumenge e Devleskoro Evangelie maškar bari borba.
3Soske amaro propovediba na sine tari zabluda ni taro melalipa, nitu hovajbaja, 4nego sar so o Devel ispitingja amen te doverinel amenge o Evangelie, agjar kjeraja lafi na ugodibaja e manušenge, nego e Devleske, Koj ispitinela amare srcia. 5Soske, sar so džanena, nikogaš na nastapingem hovavne gudle lafencar nitu podmolna alčna. O Devel svedoko baši odova. 6Nitu rodingem slava taro manuša, nitu tumendar, nitu javerendar, iako šaj sine te nastapina sar važna e Hristoskere apostojlja.
7Naprotiv, sijem sine gudle maškar tumende, sar doilka, koja tato negujnela ple čhaven. 8Agjar, pherde mangipaja ki tumende manglem te predajna tumenge na samo e Devleskoro Evangelie, nego hem amare duše, soske ulen amenge milna.
9Odoleske phrajljalen, tumen pamtinena amaro trudo hem muka: kjeribaja buti rakjate hem o dive, za da te na pera ko teret nekaske tumenge, dži kote propovedingem e Devleskoro Evangelie. 10Tumen sijen svedokja hem o Devel, sar sveto, pravedno hem bizo mahana ponašingem amen maškar tumende, koj verujnena. 11Sar so džanena, amen sekole tumendar poedinačno, sar o dat ple čhavencar ohrabringem tumen hem godi dengem tumen, hem svedočingem tumenge 12te živinen dostojno baši o Devel, Koj povikujngja tumen ko Plo Carstvo hem slava.
13Hem odoleske hem amen blagodarinaja e Devleske stalno soske, primibaja e Devleskoro slovo, so šungenle amendar, primingenle na sar manušikano slovo, nego sar Devleskoro slovo savoj tano čače – kova delujnela ki tumende, koj verujnena.
14Soske, tumen phrajljalen, ugledingen tumen e Devleske ko crkve, koj tane ko Hristos Isus ki Judeja, soske hem tumenda pretrpingen o isto taro tumare sonarodnikja, sar hem ola taro Judejcia, 15taro okola, koj mudarge e Gospodare e Isuse, hem e prorokon, a amen izgoninge; koj na ugodinena e Devleske, koj protivinenape sa e manušenge; 16koj braninena amen te vakjera e narodonge, za da te spasinenpe, agjar dopherena ple grevia sekogaš. Ama najposle e Devleskiri holi ali ki lende!
E Pavleskiri želba te dikhelen
17A amen phrajljalen, koga ačhilem bizo tumende e mujeja, a na e srceja, sijem sine uporna panda poviše, bare želbaja, te dikha tumaro muj. 18Odoleske manglem te ava ki tumende; hem me o Pavle na samo jek puti, nego duj puti, ama o satana sprečingja amen. 19Soske, koj tani amari nadež, ili radost, ili venco, baši pofalba? Ta na sijen li tumen anglo amaro Gospodari o Isus ko Leskoro ajbe? 20Oja, tumen sijen amari slava hem amari radost.