1 Solunjajna 3

I poseta taro Timotej

¹Soske našti sine vekje te trpina odova, arakhlem baši šukar te ačhova korkori ki Atina, ²a o Timotej, amaro phral hem e Devleskoro sorabotniko ko Evangelie e Hristoskoro, ispratingemle, za da te zacvrstinel tumen hem ohrabrinel ki tumari vera, ³za da te na šudrol nikoj ko akala muke; soske korkori džanena deka baši odova sijem opredelime, ⁴soske koga sijem sine ki tumende, angleder vakjergem tumenge deka ka trpina muke, hem sar so džanena agjar hem sine. ⁵Odoleske me, našti sine te trpinav, bičhagjum te sikljovav baši tumari vera, te na bi iskušinel tumen o iskušuvači hem te na ovel ko čučo amaro trudo.

Šukar haberi taro Timotej

⁶A akana, otkako alo amenge o Timotej tumendar hem angja amenge šukar haberi baši tumari vera hem mangipe, hem deka isi tumen sekogaš šukar spomen baši amenge hem deka isi tumen bari želba te dikhen amen, sar hem amen tumen, ⁷odoleske, phrajljalen, utešisalilem baši tumenge baši tumari vera ki sa amari potreba hem nevolja; ⁸soske amen živinaja akana, koga tumen tergjona cvrsto ko Gospodari.

⁹Soske, savi blagodarnost šaj te preda e Devleske baši tumenge, baši celo radost kolaja radujnaja amen baši tumenge anglo amaro Devel? ¹⁰I rat hem o dive molinaja amen sa taro srce te dikha tumaro muj hem te dophera odova, so hem falinela tumare verake.

¹¹A korkori o Devel hem amaro Dat, hem amaro Gospodari o Isus Hristos, te upravinel amaro drumo ki tumende! ¹²A o Gospodari te kjerel tumen te bajron hem te izobilinen ko mangipe jek javereske hem ko sarine, sar so hem amen isi amen ki tumende, ¹³za da te zojrakjerel amare srcia te oven neporočna ko svetost anglo amaro Devel hem Dat, ko ajbe amare Gospodareskoro o Isus Hristos sa Ple svetiencar.