1 Solunjajna 5

E Gospodareskoro Dive

¹A so kjerelape lafi baši o vremia hem saatia, phrajljalen, nae tumen potreba te pišinelpes tumenge; ²soske korkori tumen šukar džanena deka e Gospodareskoro dive ka avel sar čor ki rat. ³Koga ka vakjeren: mir hem bezbednost, togaš nenadejno ka perel uništuvanje ki lende, sar duk tari khamni džuvli, hem na ka našen latar.

⁴Ama tumen, phrajljalen, na sijen ki temnica – ta o Dive te arakhel tumen sar čor, ⁵soske sarine tumen sijen čhave e svetlinakere hem čhave e diveskere, na pripadinaja e rakjake, nitu e temnicake; ⁶hem agjar, te na sova sar o javera, nego te ova džangavde hem te ova nerne: ⁷soske okola koj sovena, sovena rakjate, hem koj makjovena, rakjakoro makjovena.

⁸Amen, koj pripadinaja e diveske, te ova nerne, te urava amen ko oklop e verakoro hem e mangipaskoro, hem e nadežeja e spasenieskoro sar šlemi, ⁹soske o Devel na opredelingja amen baši holi, nego te pridobina spasenie preku amaro Gospodari o Isus Hristos, ¹⁰Koj mulo baši amenge za da te živina zaedno Oleja, bilo te ova džangavde ili te sova. ¹¹Odoleske utešinen tumen maškar tumende hem nadgradinen tumen jek javere sar so hem kjerena!

Sar trebela te živinen

¹²Molinaja tumen, phrajljalen, te den sajgija okolenge, koj trudinenapes maškar tumende, sar so grižinenape tumenge ko Gospodari, hem opomeninena tumen. ¹³Ceninenlen upreder o sa mangipaja, baši olengoro delo. Živinen ko mir maškar tumende.

¹⁴Molinaja tumen panda, phrajljalen, sikaven e neurednon, ohrabrinen okolen so darana, pomožinen e slabon, oven trpeliva sarinencar. ¹⁵Dikhen, nikoj nikaske te na iranel bilačhipa bilačhipaja, nego sekogaš džan palo odova soj tano šukar maškar tumende hem ko sarine!

¹⁶Radujnen tumen sekogaš! ¹⁷Molinen tumen stalno! ¹⁸Blagodarinen baši sa, soske odovaj tano e Devleskiri vojlja baši tumenge ko Hristos Isus! ¹⁹Ma ačhaven o Duho! ²⁰Ma prezirinen o proroštva, ²¹ispitinen sa, zadržinen o šukar. ²²Ikjeren tumen tari sekoja pojava taro bilačhipe!

Pozdravia hem blagoslovia e phralenge

²³A korkori o Devel e mireskoro te osvetinel tumen celosno! Hem tumaro duho, hem duša, hem telo te zapazinenpes bizo mahana ko ajbe amare Gospodareskoro o Isus Hristos! ²⁴Verno tano Okova, Koj povikujnela tumen hem Koj hem ka kjerel odova.

²⁵Phrajljalen, molinen tumen hem baši amenge! ²⁶Pozdravinen sa e phralen sveto čumibaja! ²⁷A zadolžinava tumen ko Gospodari, akava pismo te čitinen sa e phralenge. ²⁸I blagodat amare Gospodareskiri o Isus Hristos te ovel tumencar. Amin!