1 Solunjajna 4
Sar te živinen ugodno e Devleske
1Najposle phrajljalen, rodaja hem opomeninaja tumen ko Gospodari o Isus, te izobilinen poviše ko okova so primingen amendar, sar trebela te živinen hem te ugodinen e Devleske, sar so hem uspejngen ko odova. 2Ustvari, džanena save naredbe dengem tumen ko anav e Gospodareske o Isus.
3Soske, akavaj tano e Devleskiri vojlja: tumaro osvetuvanje, te vozdržinen tumen taro bludstvo, 4sekoj tumendar te džanel te ikjerel plo čaro ko svetost hem čest, 5na ko pohotna strastia, sar o narodia koj na pendžarena e Devle; 6te na iskoristinel hem te na prevarinel pe phrale ko odova, soske baši sa odova o Gospodari tano Odmazduvači, sar so vakjergem tumenge hem svedočingem poangle. 7Ustvari o Devel na vikingja amen ko melalipa, nego ko osvetuvanje. 8Odoleske, koj otfrlinela odova, na otfrlinela e manuše, nego e Devle, Koj dela tumen hem Plo Sveti Duh.
9A baši o phralikano mangipe nae potreba te pišinav tumenge, soske Korkori o Devel sikagja tumen te mangen tumen jek javere, 10a tumen kjerena odova sa e phralenge ki celo Makedonija. Ama, molinaja tumen palem, phrajljalen, te kjeren odova panda poviše, 11hem te nastojnen sa taro srce te živinen tiho, te dikhen tumare bukja hem te kjeren buti tumare vastencar, sar so naredingem tumenge, 12za da te ponašinen tumen dostojna ko okola, o avrune, hem te na ovel tumen potreba taro ništo.
E Gospodareskoro ajbe
13Na mangaja, phrajljalen, te ačhoven ko bidžandipe baši o mule, za da te na žalinen sar o javera, koj naelen nadež. 14Soske ako verujnaja deka o Isus mulo hem voskresningja, agjar hem o mule ko Isus, o Devel ka anelen Oleja.
15Soske akava vakjeraja tumenge preku o slovo e Gospodareskoro, deka amen, koj živinaja hem ačhovaja dži ko e Gospodareskoro ajbe, nae te dža angleder okola, koj mule; 16soske Korkori o Gospodari ki zapoved, ko glaso e arhangeleskoro hem ki Devleskiri truba, ka hulel taro nebo hem o mule ko Hristos ka voskresninen prvo. 17Palo odova amen o dživde, amen koj ačhilem, ka ova grabime zaedno olencar ko oblakja, ko vozduh, ko presret e Gospodareja; hem agjar zasekogaš ka ova e Gospodareja.
18Odoleske utešinen tumen jek javereja akale lafencar.