1 Timotej 1
E Pavleskoro pozdrav dži ko Timotej
1O Pavle, apostoli e Hrista Isuseskoro, pali povelba e Devleskiri, amaro Spasiteli, hem e Hrista Isuseskoro, amari nadež, 2dži ko Timotej, o čačikano čedo ki vera: i blagodat, milost hem mir taro Devel o Dat hem o Hristos Isus, amaro Gospodari.
Ma te sikaven pojaver učenje
3Sar so molingjum tut, koga džava sine ki Makedonija, te ačhove ko Efes, za da te zapovedine nekaske te na sikaven pojaver, 4hem te na den vnimanie baši paramisa hem bizokrajo rodoslovia, koj poviše čhivena ko prepirke, otkolku te pomožinen baši e Devleskiri uprava, kojaj tani pali vera.
5A i cel e naredbakiri tani: mangipe taro čisto srce, hem šukar sovest hem nelicemerno vera, 6taro so nekoj otkoga na resle i cel, zaostraninge ko čuče lafia – 7mangipaja te oven učitejlja e Zakoneskere, iako na haljovena ni okova so vakjerena, ni okova so tvrdinena uporno!
8Amen pak džanaja deka o Zakoni tano šukar, ako nekoj koristinela zakonski, 9džandipaja akava: deka o zakoni nae tano vospostajmo e pravednikoske, nego baši o bezzakonikja hem o nepokorna, baši o bezbožnikja hem o grešnikja, baši o nesveta hem nečista, baši o ubijcia e dadengere hem o ubijcia e dajengere, baši okola koj mudarena manušen; 10baši o bludnikja hem baši o murša koj tane polovo izopačime, baši o trgovcia roboncar, hem baši o hovavne, baši hovavne zakletve so dena, hem baši o sa javer soj hem tano protivno e saste naukake, 11spored o slavno Evangelie e blaženo Devleskoro, kovaj tano mange doverimo.
E Devleskiri blagodat sprema o Pavle
12Blagodarinava e Hrista Isuseske, amaro Gospodari, koj dengja man sila baši odova, soske računingja man verno hem postajngja man ki služba, 13man, koj poangle sijum sine hulinava, hem goninava, hem nasilniko. Ama dobingjum milost, soske kjergjum odova taro bidžandipe hem na verujnavajne. 14A i blagodat amare Gospodareskiri, e veraja hem mangipaja izobilingja ko Hristos Isus.
15Verno tano o slovo hem dostojno – baši pherdo primiba: o Hristos Isus alo ko sveto te spasinel e grešnikon, taro koj sijum prvo me. 16A dobingjum milost tokmu baši odova, za da te sikavel o Hristos Isus, prvo ki mande, sa Pli trpelivost, baši primer okolenge, koj ka verujnen ki Leste baši večno životo. 17O caro e vekongoro – o besmrtno, nevidlivo, edinstveno Devel – čest hem slava ko sa o vekja. Amin!
18Akaja zapoved predajnavala tuke, čedo Timotej, soglasno o poranešna proroštvia baši tuke: za da te voine šukar vojna, 19te ovel tut vera hem šukar sovest, koj nekoj otfrlingela hem pretrpinge brodolom e verakiri. 20Maškar lende tane o Imenej hem o Aleksandar, koj predajngjumlen e satanaske, za da te sikljoven te na hulinen.