1 Timotej 2

Molitva baši sa o manuša hem i vlast

¹Agjar, angleder o sa te kjerenpes rodiba, molitve, molbe, blagodarnost baši sa o manuša, ²baši o cajra hem baši sare koj tane ko vlast, za da te šaj te proživina tiho hem mirno životo ko sa o pobožnost hem česnost. ³Akavaj tano šukar hem ugodno anglo Devel, amaro Spasiteli, ⁴Koj mangela sa o manuša te spasinenpes hem te aven ko pendžariba o čačipa.

⁵Soske o Develi tano jek, hem jek tano Posredniko maškar o Devel hem o manuša: o Manuš o Hristos Isus, ⁶Koj dengjape Pes sar otkup baši o sarine, baši svedoštvo ko vistinsko vreme, ⁷baši kova me sijum sine postajmo baši propovedniko hem apostoli, čače vakjerava, na hovavava, baši učiteli e narodonge ki vera hem čačipe. ⁸Hem agjar, mangava o murša te molinenpes ko sekova than, te vazden ple sveta vasta bizo holi hem prepirka.

Sar valjani te oven o džuvlja

⁹Isto agjar hem o džuvlja te ukrasinenpes ko pristojno šeja, skromno hem pretpazlivo, na pletenkencar hem zlato, ili biserencar ili skapoceno šejencar, ¹⁰nego šukar deloncar, sar so bešela e džuvlenge, koj ispovedinena deka tane pobožna.

¹¹I džuvli te sikljol ki tišina hem ki sekoja pokornost. ¹²A e džuvljake na dozvolinava te poučinel, nitu te gospodarinel upro rom, nego te ovel mirno. ¹³Soske, prvo sine sozdajmo o Adam, palo odova i Eva. ¹⁴Hem o Adam na hovavsalilo, nego i džuvli sine hovavdi, hem peli ko prestap. ¹⁵Ama oj ka ovel arakhli bijanibaja čhaven; ako ačhona ki vera hem mangipe hem ko svetost, pretpazliva.