2 Petrovo 2

Hovavne prorokja

¹A sine da hem hovavne prorokja ko narodo, sar so ka ovel hem maškar tumende hovavne učitejlja, kola tajno ka anen uništibaskere bange veruvanja hem ka odrekujnen e Gospodare, Koj kingjalen, lena upri peste sigate uništiba, ²hem but džene ka džan palo lengoro rumimo drumo, baši kaste ka hulinelpe o drumo taro čačipa. ³Hem ko alčnost ka iskoristinen tumen izmislime lafencar, ama lengoro osuduvanje tano odamna gotovo hem lengoro propast na dreminela.

⁴Soske ako o Devel na poštedingja e angelen kola grešinge, nego predajngjalen ko okovia e mrakoskere, frdingjalen ko pekol za da te oven odothe arakhle sa dži ko sudo; ⁵hem ako na poštedingja o purano sveto, nego pazingja samo e Noe, o propovedniko e pravdakoro, panda evta dušencar, koga muklja potop upro o bezbožničko sveto; ⁶ako osudingjalen ko propast o gradia o Sodom hem o Gomor hem kjergjalen ko pravo, hem postajngjalen za primer baši o idna bezbožnikja; ⁷hem ako izbavingja e pravedniko o Lot, kas so mučinela sine o rumimo život e bezzakonikongoro, ⁸soske akava pravedniko, živibaja maškar olende, mučinela sine taro dive ko dive pli pravedno duša, dikhibaja hem šunibaja olengere bezzakonska dejlja – ⁹odova značinela deka o Gospodari džanela sar te izbavinel e pobožna manušen taro iskušenie, a e nepravednon te pazinelen baši kaznibaske dži ko dive e sudoskoro; ¹⁰a pogotovo okola, kola džana palo nečista pohote e teloskere, hem na mangena o avtoriteti e Devlipaskoro. Sar drska hem ki pli vojlja manuša ola na darana te hulinen o veličestva, ¹¹dži kote o angejlja, kolaj tane pobare ki sila hem snaga, na izgovorinena hulna osuda protiv olende anglo Gospodari.

¹²A akala, sar bigogjakere životnia, kolaj ki priroda opredelime te oven lovime hem mudarde, hulinena ko okova so na džanenale, hem korkori ka mudargjoven ko plo razvrat, ¹³ka dobinen kazna baši nepravda. Ola računinena o rumimo životo diveskoro baši plo zadovolstvo, melale hem ladžake tane ola, kola uživinena ple hovajbaja koga ugostinenape tumencar. ¹⁴Olengere jajkha pherde so preljuba hem na cidenapes taro grevo; ola hovavena o neutvrdime duše. Isilen srce sikavdo ko alčnost; olaj tane čhave e prokletstvoskere.

¹⁵Mukle o čačikano drumo hem našavsalile, hem gele palo drumo taro Valaam, o čhavo e Vosoreskoro, koj manglja nepravedno plata, ¹⁶ama primingja ukor baši plo bezzakonie: laloro her so kjerela lafi ko manišikano glaso hem sprečingja e prorokoskoro delinipa.

¹⁷Odolaj tane izvojra bizo pani hem oblakja so ingarelalen i bura; baši kaske so pazinelape temno mrako zasekogaš. ¹⁸Soske odoleja so kjerena ko baro hem ko čučo lafi, hem suetna lafia hovavenalen preku telesna strasna želbe hem preku ple rumime bukja okolen, kola samo so našle taro okola koj živinena ki zabluda; ¹⁹obečinena lenge sloboda a korkori robia baši rumime bukja, soske nekoj taro soj tano pobedimo, hem odoleske tano robo.

²⁰Ako ola čače cidingepes taro melale navike taro akava sveto koga pendžarge baši amaro Gospodari hem Spasiteli o Isus Hristos, hem akana palem pletkinenape ki stapica taro rumimo životo hem pretrpinena poraz, togaš olengiri avdisutni sostojba tani pološno tari okoja ko početok. ²¹Ustvari, baši olenge ka ovel sine pošukar te na pendžaren sine o drumo e pravdakoro, otkolku otkoga pendžargele, te iranenpe tari sveto zapoved koja olenge tani predajmi. ²²Olenge ovela okova so isi jek čačikano lafi so vakjerelape, ‘O džukel iranelape ko plo čhadiba,’ hem ‘O nangjardo balo iranelape te valkajnelpe ki čik.’