2 Petrovo 3

O Posledna Dive

¹Mangljalen, akavaj tano vekje dujto poslanie, so pišinava tumenge, hem ko solduj džangavavale, preku potsetiba, tumaro čisto razum, ²za da te spomninen tumenge baši o lafia kova o sveta prorokja vakjergelen angleder, hem baši i zapoved e Gospodareskiri hem Spasiteli, koja predajngela tumenge tumare apostojlja.

³Džanen angleder o sa akava: deka ko posledna dive ka javinenpes manuša so ka khelenpes e čačipaja, kola pe ple khelibaja ka džan palo ple sopstvena strastia hem ka vakjeren: ⁴„Kaj tano o vetuvanje baši Leskoro ajbe? Soske otkoga mule o dada sa tergjola agjar, sar taro početok taro sozdavanje.“

⁵Koga ki pli vojlja mangena agjar, togaš baši olenge ačhola garavdo deka preku e Devleskoro slovo i nebesa sine odamna, hem deka i phuv taro pani hem preku o pani dobingja o postoenje, ⁶preku odova hem o togašno sveto sine potopimo pajneja hem agjar propadingja. ⁷A o avdosutne nebesia hem i phuv e isto slovoja zapazime, hem arakhenape baši jag dži ko dive e sudoskoro hem propast baši o bezbožna manuša.

E Gospodareskoro Dive

⁸Ama jek na smejnela te ovel tumenge nepoznato, mangljalen, deka baši o Gospodari jek dive tano sar iljada berš, hem iljada berš sar jek dive. ⁹O Gospodari na dugovlačinela odova so obečingja, sar so nekoj mislinena baši odova bavno, nego sikavela Plo trpenie ki tumende, soske na mangela nekoj te propadinel, nego sarine te aven dži ko pokajanie.

¹⁰A e Gospodareskoro dive ka avel sar čor rakjate; ko odova dive o nebesia ka nakhen bare bučavaja, hem sa o bukja so isi ki phuv jagaja ka raspadinenpe hem i phuv ka thabljol sa e deloncar soj ki late.

¹¹Soske sa akava ka raspadinelpes agjar, save trebela te oven te vodinen sveto životo hem ko pobožnost, tumen ¹²kola očekujnena hem sigjakjerena o ajbe baši e Devleskoro dive, koga o tharde nebesia ka raspadinenpes hem sa o bukja so isi ki phuv jagaja ka topinenpes? ¹³A amen, spored Leskoro vetuvanje, očekujnaja neve nebesia hem nevi phuv ki koja živinela i pravda.

Posledna lafia

¹⁴Odoleske, mangljalen, dži kote očekujnena akava, pogrižinen tumen Ov te arakhel tumen čista hem neporočna ko mir, ¹⁵a o dolgotrpelivost amare Gospodareskoro računinenle sar spasenie, sar so hem amaro manglo phral o Pavle pišingja tumenge, spored soj dendi leske i mudrost; ¹⁶sar so hem ko sa ple lila vakjerela baši akava; ki lende isi nesave phare te haljonpe bukja, kola o neučime hem neutvrdime iranena naopaku, hem o javera Pismia, baši plo uništiba.

¹⁷Hem agjar tumen, mangljalen, koga džanena akava angleder, pazinen tumen i zabluda taro bezzakonikja te na povlečinel tumen ki peste hem te na preperen tari tumari cvrsto položba, ¹⁸nego bajroven ki blagodat hem ko pendžariba amare Gospodare hem Spasitele o Isus Hristos. Oleske slava hem akana hem ko dive taro večnost. Amin!