Galatjajna 1

Pozdrav

¹O Pavle – apostoli, bičhavdo na taro manuša, nitu preku posredstvo manušestar, nego preku o Isus Hristos hem o Devel o Dat, Koj voskresningjale taro mule – ²hem sa o phrajlja, koj tane mancar, dži ko crkve ki Galatija. ³Blagodat hem mir ki tumende taro Devel, amaro Dat, hem taro Gospodari o Isus Hristos, ⁴Koj dengjape Pes baši amare grevia, za da te izbavinel amen taro avdisutno lukavo veko, pali vojlja amare Devleskiri hem Dat, ⁵Kaske tani slava ko sa o vekja. Amin!

Iranena e Hristoskoro Evangelie

⁶Čudinava man deka agjar sigate iranena tumen taro Okova, Koj povikujngja tumen e Hristoske ki blagodat, hem prenakhena ko javer evangelie, ⁷kova nae tano javer, samo isi disave, kola buninena tumen hem mangena te iranen e Hristoskoro Evangelie.

⁸Ama ako hem amen, ili angeli taro nebo, propovedinela tumenge javer evangelie, različno taro okova, so propovedingem tumenge, te ovel prokleto! ⁹Sar so vakjergem poangle hem akana palem vakjerava: ako nekoj propovedinela tumenge evangelie, so razlikujnelape taro okova so primingenle, te ovel prokleto!

O Pavle e Hristoskoro služiteli

¹⁰Dali me akana uverinava e manušen ili e Devle? Ili nastojnava te ugodinav e manušenge? Ako panda bi ugodinavajne e manušenge, nae sine te ovav e Hristoskoro služiteli. ¹¹Soske, izvestinava tumen, phrajljalen, deka o Evangelie, kova propovedingjum, nae tano manušikano, ¹²soske nitu me primingjumle taro manuš, nitu sikliljumle, nego preku otkrovenie taro Isus Hristos.

¹³Tumen sekako šungen baši mlo anglutno živiba ko judejstvo; sar but previše goninava sine e Devleskiri crkva hem uništinava. ¹⁴Hem ko judejstvo geljum but anglal taro me vrsnikja ko mlo narodo, vdahnimo tari prebari sila baši o običaja amare pradadengiri.

¹⁵A koga sine pali vojlja Okoleskiri, Koj odelingja man tari utroba me dajakiri hem povikujngja man preku Pli blagodat, ¹⁶te otkrinel ki mande Ple Čhave, za da te propovedinavle maškar o narodo, na posovetujngjum man odma ko telo hem ko rat, ¹⁷nitu geljum upre ko Erusalim ko okola, kola angleder mande sine apostojlja, nego geljum poadari ki Arabija hem palem irangjum man ko Damask.

¹⁸A palo trin berš geljum upre ko Erusalim, za da te dikhav e Petare, hem ačhiljum ki leste dešupandž dive, ¹⁹a nekoj javer taro apostojlja na dikhljum, osven o Jakov, o phral e Gospodareskoro. ²⁰A palem so pišinava tumenge, ekje anglo Devel vakjerava deka na hovavava.

²¹Palo odova, aljum ko kraja e Sirijake hem Kilikija. ²²A e crkvenge ki Judeja kolaj tane ko Hrista, lično sijum sine lenge panda nepoznato, ²³ola sine samo šunge: „Okova, koj nekogaš goninela amen sine, akana propovedinela i vera, koja nekogaš uništinelala sine.“ ²⁴Hem slavinena sine e Devle ki mande.