3 Jovanovo
1O starešina dži ko manglo Gaj, kas so mangavale ko čačipe. 2Mo manglo, mangava tuke te ovel tuke šukar ko sa hem te ove sasto, sar soj tano šukar tle dušake.
3Ustvari, but radujngjum man koga ale o phrajlja hem posvedočinge baši tlo čačipe, sar tu džaja ko čačipe. 4Baši mange nae pobari radost taro odova: te šunav deka me čhave džana ko čačipe.
5Mo manglo, postapineja verno ko sa so kjereja baši o phrajlja, hem odova baši o jabandžie, 6koj angli crkva posvedočinge tlo mangipe: ka kjere šukar, ako ispratinejalen palo način, sar soj tano dostojno anglo Devel, 7soske cidinge ko drumo baši Oleskoro anav, na priminge ništo taro nevernikja. 8Hem agjar, amen sijem dužna te primina asavken, za da amenda te učestvina te širina o čačipa.
9Hem pišingjum nešto e crkvake, ama o Diotref, koj mangela te ovel prvo maškar olende, na priminelamen amen. 10Odoleske ako avava odori, ka potsetinav baši oleskere dejlja, so kjerelalen, napadinela amen bilačhe lafencar, hem na samo odova so kjerela, nego korkori ov na priminela e phralen, a okola koj mangena te priminenlen, zabraninela lenge hem paldelalen tari crkva.
11Mo manglo, ma dik sar primer ko okola so kjerena bilačhipe, nego ko okola so kjerena šukaripe. Koj kjerela šukar taro Develi tano; koj kjerela bilačhipa, na dikhlja e Devle.
12Baši o Dimitrija sinele svedoštvo taro sarine – hem korkoro taro čačipe. A hem amen svedočinaja; a džaneja deka amaro svedoštvo tano čačikano.
13Sine man te pišinav tuke but, ama na mangava te pišinav tuke mastiloja hem peroja, 14a nadinava man deka ka dikhav tut skoro, hem ka kjera lafi direktno muj mujeja. 15Mir tuja! Pozdravinena tut o prijatejlja! Pozdravin e prijatelen ko anav!