Galatjajna 6
Ingaren o pharipa jek jekeskere
1Phrajljalen, ako hem da nekoj pelo ko disavo grevo, tumen koj so sijen duhovna, popravinenle asavke ko duho taro krotost, ama arakhtu tut te na ove tuda iskušimo. 2Ingaren o pharipa jek jekeskere, hem odoleja ka ispolninen o Zakoni e Hristoskoro!
3Soske, ako nekoj mislinela dekaj tano nešto, a nae tano ništo, korkori pes hovavela.
4A sekoj te ispitinel plo delo, pa togaš ka ovel pofalba samo angli peste, a na anglo javer. 5Soske sekoj ka ingarel plo pharipe. 6A koj sikljola taro slovo, neka delinel sa ple šukaripa okoleja, koj učinelale.
7Ma hovaven tumen: o Devel na dozvolinela te ovel izigrajmo! Soske so o manuš ka posejnel, odova hem ka žnejnel: 8koj sejnela ko plo telo, taro telo ka žnejnel propast; a koj sejnela ko Duho, taro Duho ka žnejnel večno životo.
9Te na ova umorna te kjera šukar, soske ka žnejna ko pravo vreme, ako na umorinaja amen. 10Odoleske, dži kote isi amen vreme, te kjera šukar sarinenge, a najviše okolenge, koj pripadinena ko amaro semejstvo ki vera.
O Pavle vakjerela baši o obrezime hem o neobrezime
11Dikhen, kozom bare bukvencar pišingjum tumenge me sopstveno vasteja!
12Sa okola, koj mangena te kjerenpes važna teloja, ola čhivena tumen te obrezinen tumen, samo za da ma te oven gonime baši e Hristoskoro krsto. 13Soske ni korkori ola, koj obrezinenapes, na pazinena o Zakoni, a mangena tumen te obrezinen tumen, za da te falinenpes tumare teloja.
14A me sijum dur taro odova te falinav man nešto javereja, osven ko krsto amare Gospodareskoro o Isus Hristos, preku Kaste o sveto tano raspnimo baši mange hem me e svetoske! 15Soske nitu o obrezanie tano nešto nitu o neobrezanie, nego nevo sozdanie.
16Hem sarinenge, koj ka sledinen akava pravilo - mir hem milost, ki lende, hem e Devleskoro Izrael. 17Ki idnina nikoj te na dosadinel man poviše, soske ingarava e Isuseskere rane ko mlo telo. 18Phrajljalen, i blagodat amare Gospodareskiri o Isus Hristos te ovel tumare duhoja! Amin!