Efesjajna 1

Pozdrav dži ki crkva ko Efesjajna

¹O Pavle, preku e Devleskiri vojlja apostoli e Isuse Hristoskoro, dži ko sveta hem verna ko Hristos Isus ko Efes: ²i blagodat ki tumende hem mir taro Devel, amaro Dat hem taro Gospodari o Isus Hristos!

Blagoslovime ko Hristos

³Te ovel blagoslovimo o Devel hem o Dat amare Gospodareskoro o Isus Hristos, Koj blagoslovingja amen, ko Hristos, sekole duhovno blagosloveja, ko nebesna thana; ⁴soske izbiringja amen ki Leste, angleder te sozdajnelpe o sveto, za da te ova sveta hem bizo fleka anglo Leste ko mangipe. ⁵Ov angleder odlučingja te posvoinel amen te kjerel amen Pe čhave preku o Isus Hristos, sprema Pli gudli namera tari Pli vojlja, ⁶za da te ovel falimi i slava tari Oleskiri blagodat, koja darujngja amen ko Plo Manglo Čhavo.

⁷Ko Isus isi amen sloboda, koleja platingja amen hem kingja amen preku Plo rat, proška amare grevonge, sprema o barvalipa tari Leskiri blagodat ⁸koja čhorgjala izobilno amenge sekole mudrosteja hem hajljojbaja. ⁹Ov sikagja amenge amen te džana i tajna tari Pli vojlja, sprema Pli gudli namera, so odlučingjala ki Leste, ¹⁰za da te kjerela koga ka phergjon o vremia; za da te khedel ko jek ko Hristos: sa soj tano ki nebesa hem soj tano ki phuv.

¹¹Ki Leste hem amenda sijem sine izbirime baši naslednikja, soske sijem sine opredelime angleder e odlukaja Okoleskiri, Koj kjerela sa sar Ov ka rešinel sprema Pli vojlja, ¹²za da te ova baši pofalba baši Leskiri slava, amen, koj vekje angleder nadingem amen ko Hristos.

¹³Ki Leste hem tumen, otkoga šungen o slovo e čačipaskoro – o Evangelie baši tumaro spasenie – hem otkoga tumen poverujngen, ulen zapečatime e Sveti Duhoja kovaj tano vetujmo, ¹⁴Koj tano garancija baši amaro nasledstvo, baši o platiba hem o kiniba okolen koj ule Devleskoro sopstvenost – za pofalba baši Oleskiri slava.

Sa čhigja telo Oleskere pre

¹⁵Odoleske hem meda, sar šungjum baši tumari vera ko Gospodari ko Isus hem baši tumaro mangipe ko sa o sveta, ¹⁶na ačhovava te spomninav tumen ko mle molitve hem te zablagodarinav baši tumenge, ¹⁷ta o Devel amare Gospodareskoro o Isus Hristos, o Dat e slavakoro, te del tumen duho taro mudrost hem otkrovenie ko čačikano pendžariba Ole: ¹⁸hem te izbistrinel o jajkha taro tumaro srce, za da te džanen ko Leskoro vikiba savi nada isi amen, hem kobori o barvalipe taro Leskoro slavno nasledstvo ko svetie, ¹⁹hem kobor tani prebari Leskiri sila sprema amende koj verujnaja - sprema i buti so delujnela tari Leskiri mokjno sila ²⁰so sikagjala ko Hristos, koga vazdingjale taro mule hem čhigjale desno Pestar ko nebesna thana, ²¹dur upreder sekova načalstvo, hem vlast, hem sila, hem gospodarstvo hem upreder o sekova anav, kova spomninelapes na samo ko akava sveto, nego hem ko okova so avela.

²²Hem sa čhigja telo Oleskere pre, a Ole baši Šero čhigjale upreder o sa ki crkva, ²³koja tani Oleskoro Telo – i polnota Okoleskiri, koj pherela sa ko sa.