Jakov 5

E barvalenge

¹Šunen akana, tumen o barvale, roven hem vikinen upro nevolje, so avena ki tumende. ²Tumaro barvalipe kirnilo, hem molcia hale tumare šeja. ³Tumaro zlato hem srebro baši ‘rgja, hem lengiri ‘rgja ka ovel svedoštvo protiv tumende, hem sar jag ka gltinel tumare tejlja. Khedingen barvalipe ko posledna dive. ⁴Ekje, i plata e rabotnikongiri, koj žnenge tumare nive, so tumen so kratingen lendar, pištinela hem o pište e žetvarengere ale dži ko kana e Gospodareske upreder o Sile.

⁵Tumen živingen ki phuv luksuzno hem baši zadovolstvia, paragen tumare srcia, sar baši o dive čhinibaske. ⁶Osudingen, mudargen e pravedniko; hem ov na protivinelapes tumenge.

Ma den tumen sovli

⁷Hem agjar, oven trpeliva, phrajljalen, dži ko e Gospodareskoro ajbe! Ekje, o zemjodelco udžarela o skapoceno plodi tari phuv, udžarela trpelivo dži kote na priminela o rano hem o pokasno bršim. ⁸Udžaren trpelivo hem tumen, zojrakjeren tumare srcia, soske tano paše e Gospodareskoro ajbe. ⁹Ma kjeren lafi so na valjani, phrajljalen, jek protiv javer, za da ma te oven osudime: ekje, o Sudija tergjola anglo udar.

¹⁰O phare cidiba hem o baro trpenie lenlen sar primer e prorokon, phrajljalen, koj kjerena sine lafi e Gospodareske ko anav. ¹¹Ekje, blažena vakjerajalen okolen, koj pretrpinge. Šungen baši o trpenie e Joveskoro, a dikhlen sar o Gospodari završingja odova; soske o Gospodari tano but milostivo hem but čustvitelno.

¹²A angleder o sa, mle phrajljalen, ma asokjeren tumen ni ko nebo ni ki phuv, nitu disave javere sovljaja! Tumaro „oja“ te ovel „oja“, a tumaro „na“ – „na“, za da ma te peren telo sudo.

Molinen tumen jek javereske

¹³Cidela li nekoj maškar tumende, neka molinelpes; veselnoj li tano nekoj, neka falinel e Devle. ¹⁴Nasvaloj li nekoj maškar tumendar, neka vikinel e starešinen tari crkva, hem ola neka molinenpes upri leste, hem neka pomazinenle taro ujle maslinkengoro ko anav e Gospodareske, ¹⁵hem i molitva e verakiri ka spasinel e nasvale hem o Gospodari ka vazdele, hem ako kjergja grevia, ka oven leske oprostime.

¹⁶Hem agjar, ispovedinen tumare grevia jek javereske hem molinen tumen jek baši javereske, za da te saskjoven! I molitva so delujnela e pravednikoskiri isila bari sila. ¹⁷O Ilija sine manuš ki priroda isto sar hem amen, hem molingjapes molitvaja te na ovel bršim hem na pelo bršim ki phuv trin berš hem šov masek. ¹⁸Hem palem molingjapes, pa o nebo dengja bršim, hem i phuv dengja plo plodi.

Ako nekoj iranela e grešniko

¹⁹Mle phrajljalen, ako nekoj tumendar cidelapes taro čačipe, hem nekoj iranelale, ²⁰neka džanel deka okova, koj ka iranel e grešniko taro oleskoro zabludimo drumo, ka spasinel oleskiri duša taro meriba hem ka učharel but grevia.