1 Petrovo 1

¹O Petar, o apostoli e Isuse Hristoskoro, dži ko izbirime manuša so živinena ki tugina, soj tane rasturime ko Pont, Galatija, Kapadokija, Azija hem Vitinija, ²izbirime taro o Devel o Dat Koj džanela sa angleder, hem osvetime taro Duho, baši te ova poslušna hem prskime e Isuse Hristoskere rateja: i blagodat hem o mir te umnožinelpe tumenge.

Dživdi nadež

³Blagoslovimo te ovel o Devel o Dat amare Gospodareskoro e Isuse Hristoskoro, Koj pali Pli bari milost, preku o voskresenie e Isuse Hristoskoro taro mule, bijangja amen ponovo baši dživdi nadež, ⁴baši nasledstvo so na nakhela, hem so nae valkajmo, hem kova na šukjola, arakhlo baši tumenge ko nebo, ⁵kas so e Devleskiri sila arakhela tumen, preku i vera, baši o spasenie, spremimo te otkrinelpe ko posledno vreme.

⁶Radujnen tumen baši akava, makar akanaske te oven da ki tuga, hem ako valjani, te nakhen taro razna iskušenia, ⁷ta o vrednost tari tumari vera, koja tani poskapoceno taro propadlivo zlato - kova ispitinelape ki jag - te sikavelpe, baši pofalba, slava hem čest ko otkrovenie e Isuse Hristoskoro, ⁸Kas so tumen mangenale e Isuse iako na dikhlenle, ki Kaste verujnena akana, iako na dikhenale, hem radujnena tumen, doborom so našti te vakjerelpe hem te opišinelpe, radosteja soj pherdi slavaja, ⁹soske resena i cel tumare verakiri: o spasenie tumare dušengoro.

¹⁰Akava spasenie rodinge hem ispitinge o prorokja, kola prorokunge baši i blagodat soj tani planirimi tumenge te delpe. ¹¹O prorokja trudinenape sine te hajljoven e Hristoskoro Duho, Koj sine ki lende, baši odova so sikavela lenge, baši kaske hem ko savo vreme, koga angleder vakjerela lenge sine baši e Hristoskoro cidiba so ka ovel hem baši o slave palo odova.

¹²Olenge sine otkrimo deka na služinena sine baši peske, nego baši tumenge, adaleja so akana tumenge tano objavimo preku okola so propovedinge tumenge o Evangelie preku Sveti Duh bičhavdo taro nebo, ko so o angejljada mangena te dikhen.

Te ova sveta

¹³Adaleske, oven spremna gogjaja, oven trezvena, neka ovel tumen pherdi nadež baši i blagodat, koja so ka ovel tumenge andi ko otkrovenie e Isuse Hristoskoro. ¹⁴Sar poslušna čhave, ma dikhen te živinen sar poangle ko tumare purane strastia, kola sine tumen koga živinena sine ko bidžandipe, ¹⁵nego sar soj Ov Sveto, Koj vikingja tumen, te oven korkori tumenda sveta ko celo tumaro ikjeriba, ¹⁶soske tano pišimo, ‘Oven sveta soske ME SIJUM sveto.’

¹⁷Hem ako vikinenale Dat Okole, Koj na dikhela koj tano koj, nego sudinela sprema o dejlja sekole jeke, akate dži kote sijen sar jabandžie, nakhenle o vreme taro tumaro životo ki dar hem ko počit sprema Leste, ¹⁸džandipaja deka na sijen kinde raspadliva bukjencar, srebroja ili zlatoja, taro tumaro čučo bezvredno životo soj tumenge tano predajmo taro tumare dada, ¹⁹nego skapoceno rateja taro Hristos, sar nevino hem čisto bakhro, ²⁰Koj sine angleder odredimo, angleder o sozdavanje e svetoskoro, a javingjape ko posledna vremia baši tumenge, ²¹koj preku Leste poverujngen ko Devel, Koj vazdingjale taro mule hem dengjale slava, agjar so tumari vera hem tumari nadež te oven ko Devel.

E Devleskoro Lafi

²²Otkoga preku o Duho očistingjen tumare duše preku poslušnost ko čačipa baši iskreno phralikano mangipa, mangen tumen jek jekeja iskreno sa taro srce, hem čisto srceja, ²³soske sijen neve bijande, na taro seme kova so merela, nego taro dživdo hem večno Devleskoro lafi kova so na merela. ²⁴Soske:

A adavaj tano o lafi, kovaj tumenge tano objavimo sar Evangelie.