Mislinen baši odova soj tano upre

¹Hem agjar, ako voskresningen e Hristoja, roden odova soj tano upre – kote so o Hristos bešela desno taro Devel. ²Mislinen baši odova soj tano upre, na baši odova soj tano ki phuv, ³soske tumen mulen hem tumaro životo tano garavdo e Hristoja ko Devel! ⁴A koga ka javinelpes o Hristos, amaro životo, togaš hem tumen ka javinen tumen Oleja ki slava.

⁵Hem agjar, mejrakjeren tumare člejna soj tane ki phuv: o bludstvo, o melalipa, i strast, i bilačhe želba, hem o alčnost, soj tano idolopoklonstvo, ⁶baši kola avela e Devleskiri holi e neposlušna čhavenge, ⁷maškar koj hem tumenda nekogaš gelen, koga živinena sine ki lende. ⁸Ama akana otfrlinenle hem tumenda sa akava: o holjaniba, i holi, o bilačhipa, hulenje, ladžutne lafia taro tumaro muj.

⁹Ma hovaven tumen jek javereja, soske huljagen o purano manuš oleskere deloncar ¹⁰hem uragen nevo, koj obnovinelape ko pherdo pendžariba palo obraz Okoleskoro, Koj sozdajngjale, ¹¹kote nae vekje Grko ni Judejco, obrezanie hem neobrezanie, varvarin, Skit, robo, slobodno, nego o Hristos tano sa hem ko sa.

¹²Hem agjar, uraven tumen sar Devleskere izbranikja, sveta hem mangle, ko milosrdno srce, blagost, smirime, krotka, trpeliva! ¹³Trpinen tumen jek javereja hem oprostinen tumenge jek javereske, ako nekoj isi so rovelape protiv nekaste, sar so hem o Gospodari oprostingja tumenge, agjar oprostinen tumenda! ¹⁴A upreder o sa odova uraven tumen ko mangipe, koja phandela sa ko sovršenstvo! ¹⁵Hem e Hristoskoro mir te vladinel ko tumare srcia, baši kaste so hem povikujme sijen ko jek telo, hem oven blagodarna!

¹⁶E Hristoskoro slovo te živinel izobilno ki tumende, ki sekoja mudrost sikljoven hem opomeninen tumen jek javere psalmencar, himne, duhovna gilja, giljajbaja e Gospodareske e blagodateja ko tumare srcia. ¹⁷Hem sa so kjerena lafeja ili ko delo, kjeren sa ko anav e Gospodareske e Isuseske, blagodarinen e Devleske o Dat, preku Oleste.

Sar valjani te oven

¹⁸Romnalen, pokorinen tumen tumare romenge, sar so bešela ko Gospodari!

¹⁹Romalen, mangen tumare romnen hem ma oven gruba sprema lende.

²⁰Čhavalen, šunen tumare roditelen ko sa, soske odovaj tano ugodno e Gospodareske!

²¹Dadalen, ma zadinen tumare čhaven, za da te na razočarinenlen.

Sar valjani te oven o robia

²²O tumen o robia, šunenlen ko sa tumare phuvjakere gospodaren, na baši jajkhenge sar okola koj ugodinena e manušenge, nego čisto srceja daraja taro Devel.

²³So hem da te kjeren, kjerenle tari duša sar baši e Gospodareske, a na baši o manuša, ²⁴džandipaja deka taro Gospodari ka priminen i nagrada e nasledstvoskoro. Služinen e Gospodareske o Hristos! ²⁵Soske, koj kjerela nepravda, ka priminela obratno i nepravda, hem na dikhelape koj tano koj.