Kobor borba isi man baši tumenge

¹Ustvari, mangava te džanen kobor borba isi man baši tumenge, hem baši okola ki Laodikija, hem baši sa koj so na dikhle man lično, ²za da te utešinenpes olengere srcia hem soedinime ko mangipa te aven dži ko sa o barvalipa ki pherdi uverenost e hajljobaskoro dži ko pendžariba i tajna e Devleskiri hem e Hristoskiri, ³ki Kaste tane garavde sa o barvalipe tari mudrost hem e džandipaskoro. ⁴A akava vakjerava za da te na hovavel tumen nekoj ubedime lafencar. ⁵Soske iako sijum otsutno ko telo, ko duho sijum tumencar, hem radujnavapes dikhibaja tumaro redo hem cvrstina tumare verakiri ko Hristos.

Koj tano Šero sekole načalstvoske hem vlast

⁶Hem agjar, sar so primingen e Hrista Isuse o Gospodari, agjar hem te džan ki Leste: ⁷vkorenime hem naddzidime ki Leste hem zacvrstime ki vera, sar so sijen sikavde, te izobilinen ko blagodarnost.

⁸Pazinen te na zarobinel tumen nekoj filosofijaja hem suetno hovajbaja palo manušikano običaj, spored o živiba e svetoskoro, a na spored o Hrista. ⁹Soske ki Leste telesno živinela sa i polnota e Devlipaskiri, ¹⁰hem tumen sijen ispolnime ki Leste, Koj tano Šero sekole načalstvoske hem vlast.

¹¹Ki Leste sijen hem obrezime so nae vasteja obrezime, huljajbaja e grevoskoro telo, palo obrezanie ko Hrista; ¹²otkoga sijen sine parume Oleja ko krštevanje, koleja hem voskresningen Oleja preku i vera ko delujba e Devleskoro, Koj voskresningjale taro mule.

¹³Tumen koj sijen sine mule ko grevia hem biobrezime ko tumaro telo, oživingja tumen zaedno Oleja, oprostibaja sa amare grevia; ¹⁴ko odova način so izbrišingja o delujba, kova so ple odredbencar sine protiv amenge; otstraningja maškar amendar, kovingjalen ko krsto; ¹⁵hem razoružingja načalstvia hem vlastia hem javno izložingjalen, pobedibaja upreder olende ko odova.

¹⁶Hem agjar, nikoj te na osudinel tumen baši hajba, ili baši piba, ili disave praznikoske, ili baši terni mesečina, ili baši i sabota. ¹⁷Odovaj tano samo senka okoleskiri so ka avel, a o stvarnost tano o Hristos. ¹⁸Nikoj te na otstraninel tumen tari nagrada, mangipaja te resel odova so poniznost hem službaja e angelengiri, te mukelpes ko odova so dikhlja, te vazdelpe ko čučo ple telesno gogjaja, ¹⁹a na ikjerelapes baši o Šero taro kova celo Telo, phanlo hem pomožimo e zglobencar hem o vrske, bajrola baripaja, kova dela o Devel.

²⁰Hem agjar, ako mulen e Hristoja, baši o elementarna bukja e svetoskere, soske dozvolinena te opredelinenpes tumenge propisia, sar te živinen ko sveto: ²¹„Ma astar! Ma vkusin! Ma pipin!“ ²²Sa akava so propadinela e upotrebaja spored manušikane zapovedia hem učenje; ²³sa akava dikhjola mudrost, so sostojnelapes ki samovolno pobožnost hem poniznost hem ki nepoštedno stroga ko telo, a na ko nešto česno, nego samo baši zadovolstvo e teloske.