Opišiba baši o Teofil

¹Soske but džene počminge te opišinen o bukja so ule, koj tale potpuno uverliva maškar amende, ²sar so predajnge amenge okola, koj taro početok sine dikhle pe jajkhencar hem so služinena e Slovoske, ³razmislingjum hem me, otkoga ispitingjum sa podetalno taro početok, te opišinavlen tuke ko redo, sajdimeja Teofil, ⁴za da te hajljove o čačipe odoleskoro, ko kova so sijan sine sikavdo.

O vakjeriba baši o bijanibe e Jovan Krstiteleskoro

⁵Ko dive e judejsko caroskoro o Irod, sine jek svešteniko ko anav Zaharija, taro e Avijaskoro rodo; hem oleskiri romni taro e Aroneskere čhaja, ko anav Elisaveta. ⁶Solduj džene sine pravedna angla ko Devel, živinge bizo nešto te falinel, sprema sa e Gospodareskere zapovedia hem pravila. ⁷Na sinelen čhave, soske i Elisaveta sine bizoplodi, a solduj džene sine ko berša.

⁸Jek puti koga ov kjerela sine i svešteničko služba angla ko Devel, ko redo taro po čini, ⁹sprema o svešteničko običaj, pelo leske žrepkaja te khuvel e Gospodareske ko hrami hem te pokadinel. ¹⁰A ko vreme e kadibaskoro, celo gužva taro narodo molinelape sine avrijal.

¹¹Togaš javingjape leske e Gospodareskoro angeli, terdindor desno taro e kadibaskoro žrtveniko. ¹²Koga dikhljale, o Zaharija buningjape hem dar astargjale.

¹³Ama, o angeli vakjergja leske: „Ma dara, Zaharija! Soske tani šundi tli molitva! Tli romni i Elisaveta ka bijanel čhavo, kaske trebela te de o anav Jovan. ¹⁴Ka radujne tut hem ka veseline tut, hem but džene ka radujnenpe ko oleskoro bijanibe. ¹⁵Soske ka ovel baro anglo Gospodari - nae te pijel ni mol ni alkoholna pijalokja; hem ka phergjol e Sveti Duhoja panda ko vogi tari pli daj; ¹⁶hem but Izraelska čhaven ka obratinelen ko Gospodari, olengoro Devel. ¹⁷Ov ka džal angli Leste e Ilijaske ko duho hem sila, za da te obratinel o srcia e dadengere ko čhave; a o nepokorna ki mudrost e pravednikongiri, hem te spreminel Leske e Gospodareske sovršena manuša.“

¹⁸A o Zaharija vakjergja e angeleske: „Palo so ka pendžarav odova? Me sijum phuro, a hem mi romni phuri tani ko ple dive!“

¹⁹O angeli odgovoringja hem vakjergja leske: „Me sijum o Gavriel, koj tergjola anglo Devel hem bičhavdo sijum te kjerav lafi tuja hem te izvestinav tuke akava radosno haberi. ²⁰Hem ekje, ka lalorgjove hem na kašti te kjere lafi dži ko dive, koga ka ovel akava; soske na verujngjan ko me lafia, so ka ispolninenpes ko plo vreme.“

²¹A o narodo adžikjerenale sine e Zaharija hem čudinenapes sine soske doborom but zadržingjape ko hrami. ²²A koga iklilo, našti sine te kjerel lencar lafi hem ola halile deka dikhlja videnie ko Hrami. Hem ov delalen sine znakja hem ačhilo laloro. ²³Hem koga nakhle o dive tari oleskiri služba, irangjape ko plo kher.

²⁴A palo odola dive, oleskiri romni Elisaveta ačhili khamni hem garavelape sine pandž masek hem vakjerela sine: ²⁵„Akava kjergja mange mo Gospodari ko odola dive koga dikhlja ki mande za da te cidel mi ladž maškar o narodo.“

O vakjeriba baši e Isuseskoro bijanibe

²⁶A ko šovto masek, o Devel bičhagja e angele e Gavriele ki Galilejsko diz, ko anav Nazaret, ²⁷ki čhaj verimi romeske, ko anav Josif, taro e Davideskoro kher. A o anav e čhajakoro sine Marija. ²⁸Hem koga o angeli alo ki late vakjergja lake: „Radujn tut, arakhljan milost anglo Devel! O Gospodari tano tuja, blagoslovimi sijan tu maškar o džuvlja!“

²⁹Oj darandili taro adava lafi hem razmislinela sine: savo pozdrav ka ovel odova? ³⁰Togaš o angeli vakjergja lake: „Ma dara Marija, soske arakhljan milost anglo Devel. ³¹Hem ekje, ka ačhove khamni hem ka bijane Čhavo, hem ka dele o anav Isus. ³²Ov ka ovel baro hem ka vakjerelpe Čhavo e Najbareskoro. Hem o Gospodari o Devel ka dele o prestol Oleskere dadeskoro e Davideskoro. ³³Hem ka carujnel upro e Jakoveskoro kher dovek, hem Oleskoro carstvo nae te ovele krajo.“

³⁴A i Marija vakjergja leske e angeleske: „Sar ka ovel odova, koga na džanava muršeske?“

³⁵O angeli odgovoringja lake hem vakjergja: „O Sveti Duh ka avel ki tute hem i sila e Najbareskiri ka mukelpe upri tute; odoleske o Sveto Čhavo kova ka ovel bijando tutar - ka vakjerelpe Devleskoro Čhavo. ³⁶Hem ekje, tli familija i Elisaveta, hem oj ačhili khamni isila murš ko plo phuripa. Hem olake tano vekje ko šovto masek, koja vakjerenala bizo plodi. ³⁷Soske nijek lafi taro Devel nae te ačhol bizo sila.“

³⁸I Marija vakjergja leske: „Ekje tani e Gospodareskiri sluginka, neka ovel mange spored tlo lafi!“ Hem o angeli gelo peske latar.

I Marija arakhelape e Elisavetaja

³⁹Ko odola dive, i Marija uštili hem geli sigate ko planinsko krajo, ki jek judinsko diz. ⁴⁰Khugja ko kher e Zaharijaske hem pozdravingjala e Elisaveta.

⁴¹Hem štom i Elisaveta šungja o pozdrav tari Marija, o bebe rupingja ko vogi lake, a i Elisaveta pherdili e Sveti Duhoja. ⁴²Hem vikingja glasno hem vakjergja: „Blagoslovimi sijan tu maškar o džuvlja! Hem blagoslovimo tano o plodi ko tlo vogi! ⁴³Hem kotar mange tano odova, i daj mle Gospodareskiri te avel ki mande? ⁴⁴Soske, ekje, koga o glaso taro tlo pozdrav alo ke mle kana, o bebe rupingja taro radost ko mo vogi. ⁴⁵Hem blaženo tani odoja, koja poverujngja deka ka phergjol odova, so o Gospodari vakjergja lake.“

I Himna e Marijakiri

⁴⁶Hem i Marija vakjergja:

⁵⁶A i Marija ačhili olaja negde trin masek; hem irangjape ko plo kher.

O bijanibe e Jovan Krstiteleskoro

⁵⁷A e Elisavetake alo lake o vreme te bijanel, hem bijangja murš. ⁵⁸Hem koga olakere komšije hem familija šunge deka o Gospodari sikagja lake bari milost, radujngepe olaja.

⁵⁹A ko ovtoto dive ale te kjerenle suneti e čhave, hem vikinenale sine Zaharija, ko anav leskere dadeskoro. ⁶⁰Ama leskiri daj vakjergja: „Na, nego ka vikinelpe Jovan!“

⁶¹Hem vakjerge: „Nae nikoj ki tli familija, koj vikinelape agjar.“ ⁶²Hem dengele znakja leskere dade, sar bi mangela te vikinenle.

⁶³A ov rodingja tabla hem pišingja: „Jovan o anav tano leskoro.“ Hem sarine začudingepe. ⁶⁴Hem odma phravdile o muj leskoro hem i čhip hem kjergja lafi hem blagoslovinela sine e Devle.

⁶⁵Hem dar astargja sa olengere komšijen. Hem kjerelape sine lafi baši sa odova ko celo planinsko krajo ki Judeja, ⁶⁶hem sarine, koj šunge, priminge odova ko ple srcia, vakjeribaja: „So ka ovel taro akava čhavo?“ Soske e Gospodareskoro vas sine oleja.

E Zaharijaskoro slaviba hem proroštvo

⁶⁷A o dad leskoro o Zaharija pherdilo e Sveti Duhoja hem prorokujnela sine, vakjeribaja:

⁸⁰A o čhavo bajrola sine hem zojragjovela sine ko duho hem sine ko pustine dži ko dive koga javingjape e Izraeleske.

*Stiho 78: E Sabajleskoro Kham tano o Isus Hristos.