Luka 2

E Isuseskoro bijanibe

¹A ko odova vreme iklili zapoved taro caro Avgust baši popis baši sa o žitejlja. ²Odova sine prvo popis, koga o Kvirinej upravinela sine ki Sirija. ³Hem sarine džana sine za da te pišinenpe, sekoj ki pli diz.

⁴Agjare hem o Josif gelo tari Galileja, tari diz Nazaret, upre ki Judeja, e Davideske ki diz, koj tano vakjerdo Vitleem, soske sine taro e Davideskoro kher hem familija, ⁵te pišinelpe e Marijaja, i verimi romni oleja, koja sine khamni.

⁶A koga sine odori – alo vreme lake te bijanel. ⁷Hem bijangja pe prvobijande Čhave, pa pakjargjale hem čhigjale ki jek korpa baši hajbaske pus so čhivelape, soske baši olende najne than ki gostilnica.

⁸A ko odova isto krajo ovčajra rakjarena sine avrijal ko pole, arakhena sine pe bakhren. ⁹Hem taro jek puti e Gospodareskoro angeli alo lenge hem e Gospodareskiri slava osvetlingjalen, pa darandile but. ¹⁰O angeli pak vakjergja lenge: „Ma daran, soske, ekje, javinava tumenge šukar haberi, baro radost, koja ka ovel baši sa o narodo: ¹¹soske avdije bijasalilo tumenge Spasiteli, e Davideske ki diz, Koj tano o Hristos* Gospodari. ¹²Hem akavaj tano tumenge znako: ka arakhen Bebe pakjardo, sar pašljola ki korpa baši hajbaske pus so čhivelape!“

¹³Hem taro jek puti e angeleja ale bari gužva nebesno vojska, kova falinena sine e Devle, vakjeribaja:

¹⁵A koga o angejlja gele peske olendar ko nebo, o ovčajra kjerena sine lafi maškar peste: „Togaš, te dža dži ko Vitleem hem te dikha so ulo odoriga, baši kova javingja amenge o Gospodari!“

¹⁶Hem sigjarindor ale hem arakhlelen: e Marija hem e Josife, hem o Tikno Bebe sar pašljola ki korpa baši hajbaske pus so čhivelape. ¹⁷A štom dikhle, vakjerge sa so sine lenge vakjerdo baši o Tikno Bebe. ¹⁸Hem sarine koj šunge, čudinenape sine baši odova, so o ovčajra vakjerge lenge. ¹⁹A i Marija zapamtinela sine sa akala lafia hem razmislinela sine baši lenge ko plo srce.

²⁰Hem o ovčajra irangepes, slavibaja hem falibaja e Devle, baši sa so šunge hem dikhle, agjar sar so sine lenge vakjerdo.

²¹Hem koga alo o ovtoto dive, baši Oleskoro obrezanie, dengele o anav Isus, sar so vakjergjale o angeli, angleder te ovel začnimo ko vogi.

E Isuse anenale ko Hrami

²²Hem koga nakhle o dive taro lakoro očistiba, sprema e Mojseskoro Zakoni, angele ko Erusalim, za da te denle angla ko Devel, ²³sar soj tano pišimo e Gospodareske ko Zakoni: ‘Sekova murš, kova bijangjovela prvo, te ovel posvetimo Leske e Gospodareske!’, ²⁴hem te den žrtva, sar soj tano vakjerdo e Gospodareske ko Zakoni – ‘duj gugutke ili duj gulubia.’

²⁵Hem ekje, ko Erusalim bešela sine manuš ko anav Simeon, hem odova manuš pravedno hem pobožno, koj udžarela sine e Izraeleskiri uteha; hem o Sveti Duh sine upri leste. ²⁶Oleske o Sveti Duh sikagja deka nae te dikhel meriba, dži kote na dikhelale e Hrista* e Gospodareskoro. ²⁷Hem vodimo taro Sveti Duh alo ko Hrami; hem koga o roditejlja angele e Tikne Čhave e Isuse, za da te kjeren upri Leste o običaj e Zakoneskoro, ²⁸leljale ke ple vasta, blagoslovingja e Devle hem vakjergja:

³³A o Josif hem i daj Leskiri i Marija čudinenapes sine baši odova, so kjerela sine lafi baši Leske. ³⁴Hem o Simeon blagoslovingjalen hem vakjergja lake Oleskere dajake i Marija:

³⁶Sine hem i proročica i Ana, e Fanuileskiri čhaj, taro e Asireskoro pleme; oj sine but phuri, taro plo čhajipe e romeja sine samo ko brako evta berš, ³⁷a sar udovica dži ko ovtovardešuštar berš, na mukela sine o Hrami, služinela sine e Devleske posteja hem molitvaja i rat hem o dive.

³⁸Hem ko isto saati oj ali hem slavingja e Devle hem vakjerela sine baši Leske sarinenge, koj adžikjerena sine o spasenie e Erusalimeskoro.

³⁹Hem koga završinge sa sprema e Gospodareskoro Zakoni – irangepe ki Galileja ki pli diz Nazaret.

⁴⁰A o Čhavo bajrola sine hem zojragjovela ko duho sine, phergjola sine mudrosteja, hem e Devleskiri blagodat sine Oleja.

⁴¹Hem sekova berš Oleskere roditejlja džana sine ko Erusalim ko prazniko Pasha. ⁴²Koga sinele dešuduj berš gele, sprema o običaj ko Erusalim, ko prazniko.

⁴³Hem koga nakhle o dive, ko iraniba khere, o Čhavo o Isus ačhilo ko Erusalim, a Oleskere roditejlja na džange baši odova, ⁴⁴nego, mislinge dekaj tano maškar o patnikja, nakhle jek dive drumo hem rodenale sine maškar i familija hem o pendžarde.

⁴⁵Hem koga na arakhlele, irangepe ko Erusalim te rodenle. ⁴⁶Hem palo trin dive arakhlele ko Hrami sar bešela maškar o učitejlja, šunelalen hem pučelalen. ⁴⁷A sarine koj šunenale sine čudinenape sine baši Oleskiri godi hem so odgovorinela sine.

⁴⁸Koga dikhlele čudingepes hem i daj Leskiri vakjergja Leske: „Mo Čhavo, so kjergjan amenge agjar? Dik! To dat hem me mučingem amen, rodindor Tut.“

⁴⁹Ov vakjergja lenge: „Soske rodena man? Zarem na džanena deka Me trebela te ovav ko odova, kovaj soj tano Me Dadeskoro?“ ⁵⁰Ama ola na halilele o lafi so vakjergja lenge.

⁵¹Hem hulilo olencar hem alo ko Nazaret, hem sine lenge poslušno. A Oleskiri daj pazinela sine sa odola lafia ko plo srce.

⁵²A o Isus džala sine angle ki mudrost, ko bajrojbe hem ki blagodat anglo Devel hem anglo manuša.

*Stihia 11 hem 26: O Hristos ko grčki značinela Mesija, ili Pomazaniko.