Brako hem razvod

¹Hem uštilo odothare hem alo ko predejlja ki Judeja, tari okoja strana e Jordanestar; hem palem o narodo pridružingjapes Leske, a Ov poučinelalen sine, spored Plo običaj,

²hem ale Leske o farisea hem pučlele, za da te iskušinenle: „Dozvolimoj li tano e romeske te mukel e romnja?“

³A Ov odgovoringja lenge hem vakjergja: „So zapovedingja tumenge o Mojsej?“

⁴Ola vakjerge: „O Mojsej dozvolingja te pišinelpes lake razvodno pismo hem te mukelpes.“

⁵Ama o Isus vakjergja lenge: „Baši tumaro koravo srce – ov pišingja tumenge odoja zapoved. ⁶Ama, ko početok taro sozdavanje, o Devel ‘kjergjalen: murš hem džuvli. ⁷Odoleske o manuš ka mukel pe dade hem pe daja hem ka prilepinelpes uza ki pi romni; ⁸hem solduj džene ka oven jek telo.’ Hem agjar, nae tane vekje duj – a jek telo. ⁹Hem agjare, o Devel so soediningja, o manuš te na razdvojnel.“

¹⁰Hem khere, o učenikja palem pučlele baši odova. ¹¹A Ov vakjergja lenge: „Koj ka mukel pe romnja hem ženinelapes javeraja, kjerela preljuba sprema late. ¹²Hem ako oj mukela e rome hem ženinelapes javereske, kjerela preljuba.“

¹³Hem anenajne Leske čhaven, za da te doprinelen, a o učenikja braninenalen sine.

¹⁴A koga o Isus dikhlja odova, na osetingja fino, hem vakjergja lenge: „Muken e čhaven te aven ki Mande; ma braninen olen; soske asavkenge pripadinela e Devleskoro Carstvo! ¹⁵Čače vakjerava tumenge, koj na priminela e Devleskoro Carstvo sar tikno čhavo, nae te khuvel ki leste.“ ¹⁶Hem gušingjalen hem blagoslovingjalen, čhigja pe vasta upri lende.

O barvalo čhavo

¹⁷Hem koga ikljola sine ko drumo, nekoj prastandilo, pelo ko kočia angli Leste hem pučljale: „Šukar Učitele, so te kjerav, za da te nasledinav večno životo?“

¹⁸A o Isus vakjergja leske: „Soske vakjereja Man šukar? Nikoj nae tano šukar osven jek Devel. ¹⁹Džaneja o zapovedia: ‘Ma mudar! Ma kjer preljuba! Ma čor! Ma svedočin hovavno! Ma kjer izmama! Poštojn te dade hem te daja!’“

²⁰Ama ov odgovoringja Leske: „Učitele, sa odova pazingjumle taro mlo ternipe.“

²¹A o Isus dikhljale, zamangljale, hem vakjergja leske: „Jek falinela tuke: dža, bikin sa so isi tut, hem de e čorolenge hem ka ovel tut barvalipe ko nebo! Hem ava, le o krsto hem sledin Man.“

²²A ov rastužingjape taro odova lafi hem gelo peske žalibaja, soske sinele but imoti.

²³Hem o Isus dikhlja naokolu hem vakjergja lenge Ple učenikonge: „Kobor pharo ka khuven o barvale e Devleske ko Carstvo.“

²⁴A o učenikja čudingepes taro Oleskere lafia.

Ama o Isus palem lelja te kjerel lafi hem vakjergja lenge: „Čhavalen, kobor tano pharo te khuven e Devleske ko Carstvo, okola so nadinenapes ko barvalipe! ²⁵Polokhoj tano e kamilake te nakhel maškar e suvjakere kana otkolku o barvalo te khuvel e Devleske ko Carstvo!“

²⁶A ola začudingepes panda poviše, vakjeribaja jek javereske: „Togaš koj šaj te spasinelpes?“

²⁷O Isus dikhljalen hem vakjergja lenge: „Baši o manuša odovaj tano nevozmožno, ama e Devleske nae tano; soske baši o Devel saj tano možno!“

²⁸O Petar počmingja te vakjerel Leske: „Dik, amen muklem sa hem džaja pali Tute!“

²⁹O Isus pak odgovoringja hem vakjergja: „Čače vakjerava tumenge: nae nikoj koj ka mukel kher ili phralen, ili phejnen, ili daja ili dade, ili čhaven, ili nive, baši Mange hem baši o Evangelie, ³⁰a te na priminel, akana šelkratno, ko akava vreme: khera hem phrajlja hem phejna, hem daja hem čhave hem nive, zaedno e gonibaja – a ko idno veko: večno životo. ³¹Ama but džene prva ka oven posledna, a o posledna – prva.“

³²A koga sine ko drumo uklindor ko Erusalim, o Isus džala sine angli lende, hem čudinenapes sine; a okola koj džana sine pali Leste darana sine. Hem palem khedingja e Dešuduje Dženen hem počmingja te vakjerel lenge so ka ovel Oleja: ³³“Ekje, džaja upre ko Erusalim hem o Manušikano Čhavo ka ovel predajmo e glavno sveštenikonge hem e knižnikonge hem ka osudinenle ko meribe, hem ka predajnenle e narodonge so verujnena ko but devejlja; ³⁴hem ka asanle, ka čhungarenle, ka kamšikujnenle hem ka mudarenle, a Ov palo trin dive ka voskresninel.“

³⁵Hem ale Leske o Jakov hem o Jovan, e Zavedeskere čhave, hem vakjerge Leske: „Učitele, mangaja te kjere amenge so ka roda Tutar.“

³⁶Ov pučljalen: „So mangena te kjerav tumenge?“

³⁷Ola pak vakjerge Leske: „De amen te beša jek tari desno, a jek tari levo, uzo Tute ki Tli slava!“

³⁸A o Isus vakjergja lenge: „Na džanena so rodena! Šaj li te pijenla i čaša so Me pijavala ili te krstinen tumen e krstibaja koleja Me krstinava Man?“

³⁹Ola odgovoringe Leske: „Šaj!“

Ama o Isus vakjergja lenge: „Ka pijenla i čaša so Me pijavala hem ka oven krstime e krstibaja koleja Me krstinava Man; ⁴⁰ama te bešelpe tari desno ili tari levo uza Mande, odova na davale Me, a ka delpes okolenge, baši kaske tano spremimo.“

⁴¹A o Deš Džene koj šunge, počminge te holjanen protiv o Jakov hem o Jovan. ⁴²Ama o Isus povikujngjalen ki Peste hem vakjergja lenge: „Džanena deka okola, koj računinenapes baši vladetejlja e narodongere – gospodarinena upro lende; hem deka olengere o bare isilen vlast upro lende. ⁴³Ama maškar tumende nae tano agjare; a koj mangela te ovel baro maškar tumende neka ovel tumenge sluga! ⁴⁴A koj mangela te ovel prvo maškar tumende, neka ovel sluga sarinenge, ⁴⁵soske hem o Manušikano Čhavo na alo te služinen Leske, nego te služinel hem te dela Pli duša baši otkup bute dženenge!“

O Isus saskjarela e korole o Vartimej

⁴⁶Hem ale ko Erihon. A koga ikljola sine taro Erihon, Ple učenikoncar hem bare gužvaja, o Vartimej, e Timejeskoro čhavo, korolo hem mangela peske sine devlenge, bešela sine uzo drumo. ⁴⁷Hem štom šungja deka tano odova o Isus Nazareco, počmingja te vikinel hem te vakjerel: „Isuse, čhavo Davideskoro, smilujn Tut mange!“

⁴⁸A but džene zakaninenapes sine leske te kjutinel, ama ov vikinela sine panda posilno: „Davideskoro Čhavo, smilujn Tut mange!“

⁴⁹O Isus ačhilo hem vakjergja: „Vikinenle!“

Hem povikujngele e korole hem vakjerge leske: „Ma dara! Ušti, vikinela tut!“

⁵⁰A ov frdingja pli nametka, rupingja hem alo ko Isus.

⁵¹O Isus palem vakjergja leske: „So mangeja te kjerav tuke?“

A o korolo odgovoringja Leske: „Učitele, te dikhav!“

⁵²Togaš o Isus vakjergja leske: „Dža tuke – ti vera spasingja tut!“ Hem odma dikhlja hem cidingja pali Leste, palo e drumoja.